ڕیکلام
Banner

Banner

Banner

Banner

درێژەی بابەتەکە

هه‌ستکردن به‌ گوناهـ له‌ چیرۆکى (که‌ زیندانیی کرام) دا ~ حەمە مەنتک

به‌شی: ئەوان
16 - 01 - 2015

مرۆڤ له‌و ماوەیه‌ى که‌ له‌ ژیاندا دەیگوزەرێنێت ڕەنگه‌ تووشى دەیان ناخۆشى و دەردە سه‌رى ببێت. یه‌کێک له‌و دەردە سه‌ریانه‌ هه‌ژاریه‌، هه‌ژارى بکه‌وێته‌ ناو هه‌ر خێزانێک، هه‌ر کۆمه‌ڵگایه‌ک، هه‌ر میلله‌تێک دایدەڕزێنێت.


ڕەنگه‌ پاڵنه‌رێکى به‌هێز بێت له‌وەى که‌ مرۆڤ وا لێ بکات زۆر ڕێگاى نایاسایى بگرێته‌به‌ر. ئه‌م چیرۆکه‌ى که‌ ئێمه‌ دەمانه‌وێت خوێندنه‌وەى بۆ بکه‌ین له‌ژێر تیشکى ڕەخنه‌دا چیرۆکى (که‌ زیندانیى کرام) ى چیرۆکنووس(باران)ە، ئه‌م چیرۆکه‌ له‌ ژمارە (1)ى پاشکۆى(ڕووبه‌ری داهێنان)ى هه‌فتەنامەى (ڕووبه‌ر) ڕێکه‌وتى (2/2/2010) بڵاوکراوەته‌وە. ئه‌م کورته‌ چیرۆکه‌ به‌شێوەیه‌ک گێڕانەوەى بۆ کراوە، گێڕەرەوەى هه‌موو شت زانه‌‌، هه‌ندێکجار دەکه‌وێته‌ مه‌نه‌لۆگ له‌گه‌ڵ خۆى، که‌سایه‌تى ناو چیرۆکه‌که‌ فه‌رمانبه‌رە له‌یه‌کێک له‌ فه‌رمانگه‌کان و خاوەنى شه‌ش منداَله‌ و به‌رامبه‌ر خێزانى زۆر دڵرەقه‌ و هه‌ردەم گومانى به‌رامبه‌ر هه‌یه‌، منداڵه‌ ناوەنجییه‌که‌ى نه‌خۆش دەکه‌وێت و بڕێک پارە له‌ فه‌رمانگه‌ دەدزێت و دواتر دەیگه‌رێنێته‌وە و له‌و کاته‌دا لێى ئاشکرا دەبێت و زێندانیى دەکرێت بۆ ماوەى یه‌ک ساڵ. له‌به‌رئه‌وەى که‌سایه‌تى ناو چیرۆکه‌که‌ بیرى کردۆته‌وە که‌ گوناهێکى زۆرى کردووە، به‌پله‌ى یه‌که‌م به‌رامبه‌ر خێزانى، ئه‌مه‌ش ئازارێکى زۆرى پێ دەگه‌یه‌نێت. ئه‌و زۆرتر تاوانى به‌رامبه‌ر ژن و منداڵه‌کانى کردووە، هاوڕێیه‌کانیشى له‌ فه‌رمانگه‌ تاوانیان به‌رامبه‌ر به‌ ئه‌و کردووە و به‌ دزیان له‌ قه‌ڵه‌م داوە، هه‌رچه‌ندە وەک خۆى دانى پێدا دەنێت که‌ له‌به‌ر پێویستى نه‌بوایه‌ دزى نه‌دەکرد.
هه‌موومان دەزانین کۆمه‌ڵگاى کوردى تاکوو ئێستا عه‌قڵیه‌تى پیاوسالارى به‌سه‌ریدا زاڵه‌. پیاوەکانى له‌ماڵه‌وە هه‌روەک دەسه‌ڵاتدارێک حوکم دەکه‌ن. عه‌قڵیه‌تێکه‌ پێویستى به‌ گۆڕانێکى له‌ ڕیشه‌وە هه‌یه‌، چونکه‌ تاکى کورد له‌ ڕووى هۆشیارییه‌وە به‌رامبه‌ر به‌ بوون، به‌ ژیان به‌گشتى زۆر سنووردارە و تا ئێستا نه‌یتوانیووە خۆى بگه‌یه‌نێته‌ ئاستى هۆشیارى میلله‌تان. چیرۆکنووس له‌م چیرۆکه‌دا باسى ئه‌و پیاوسالاریه‌مان بۆ دەکات، یه‌کسانى کردووە به‌ گوناهێکى گه‌ورە، تیایدا که‌سایه‌تى ناو چیرۆکه‌که‌ له‌و قۆناغه‌ى ژیانیدا که‌ له‌ زیندانه‌ هۆشیار بۆته‌وە و هه‌ست به‌ مرۆڤبوونى و لێپرسراویه‌تى خۆى دەکات، بۆیه‌ ئه‌مه‌ش له‌ناخه‌وە ئازارى دەدات و وا هه‌ست دەکات گه‌ورەترین گواناهى کردووە و.ویژدانى ئازارێکى زۆری دەدات. چیرۆکنووس هه‌وڵدەدات له‌ ڕێگاى ئه‌م چیرۆکه‌وە تاکى کورد، پیاوى کورد هۆشیار بکاته‌وە " ته‌واوى مانگى یه‌که‌م کونجه‌که‌م بۆنى که‌ڕووى لێدەهات و تووشى هه‌ناسه‌ ته‌نگیی دەکردم ، دواتر نازانم خۆم تێیدا که‌ڕووم کرد یاخود بۆ گه‌نى ئاکارەکانى خۆم، بۆنکه‌ڕووى زیندانه‌که‌ى له‌بیر بردمه‌وە، شه‌وگارى به‌ندیخانه‌ تاڵتر بوو له‌ زەقنه‌بووت و ڕۆژ داوى ڕۆژ دەروونم وێرانتر دەبوو ، تا دەهات زیاتر یادى ژن و منداڵه‌کانم دەکرد و نامه‌ردێکانى خۆمم له‌ هه‌موو سه‌ردەمى ڕابردوودا دەهاته‌وە به‌رچاو" ئه‌مه‌ش حاڵه‌تى هۆشیار بوونه‌وەیه‌ لێرەدا دەبێت تاکى کورد هۆشیار بێته‌وە به‌رامبه‌ر که‌سانى به‌رامبه‌رى ، چونکه‌ ئه‌وانیش مافى تاکایه‌تى و که‌سایه‌تى خۆیان هه‌یه‌، ژن که‌ دەکه‌وێته‌ ژێر سێبه‌رى پیاو مافى تایبه‌تى خۆى هه‌یه‌ که‌ دەبێت پیاوەکه‌ بۆی دابین بکات و بیداتێ. دەبێت وا سه‌یر بکرێت له‌ مرۆڤایه‌تى ئه‌و نه‌درێت. ئه‌م چیرۆکه‌ له‌ ڕووى هونه‌رییه‌وە ئاستێکى هونه‌ریى جوانى هه‌یه‌، لێرەدا که‌سایه‌تى چیرۆکه‌که‌ ڕاسته‌وخۆ قسه‌ دەکات. هه‌ندێکجار به‌شێوەى مه‌نه‌لۆگ دەدوێت. ئه‌و بۆ که‌سى دووەم قسه‌ دەکات که‌ نادیارە، ئه‌مه‌ش بوارى بۆ دەڕەخسێنێت که‌ له‌ شکسته‌ خودیه‌کانى خۆى بدوێت، له‌و که‌نفتى و تاڵیانه‌ى خۆى بدوێت که‌وا دەکات ئێمه‌ی‌ خوێنه‌ر له‌ناخه‌وە هه‌ست به‌به‌زەیى دەکه‌ین. ئه‌م جۆرە شێوازە وا دەکات زانیارى ته‌واو بداته‌ دەسته‌وە بۆ ئه‌وەى ئه‌وه‌ی له‌ناخییه‌وه‌یه‌تى به‌تاڵى بکاته‌وە، ئه‌م به‌تاڵکردنه‌وەى ناخه‌ جۆرێکه‌ له‌ که‌مکردنه‌وەى ئازارى ناخی که‌سێک حاڵه‌تێکى هه‌یه‌ گرێیه‌کى دەروونى لا دروست دەبێت زۆر ئازارى پێوە دەخوات ، به‌ڵام گه‌ر هاتوو بۆ که‌سێکى ترى باسکرد و ناخى به‌تاڵ بکاته‌وە ئه‌وا ئه‌و ئازارەى له‌ناخیدایه‌ سوکتر دەبێت.
که‌سایه‌تى ناو چیرۆکه‌که‌ سه‌ر به‌ چینى هه‌ژارى ناو کۆمه‌ڵگای کوردیه‌، ئه‌مه‌ش گرفتى زۆربه‌ى زۆرى تاکى کوردە، که‌ هیچ به‌رنامه‌یه‌کیان نیییه‌ بۆ ژیان، به‌تایبه‌تى ژیانى هاوسه‌ریی،. ئه‌وان هاوسه‌ر ، یاخود خێزانه‌کانیان ته‌نها به‌و چاوە سه‌یر دەکه‌ن که‌ ئامێرێکه‌ بۆ کاروبارى ناو ماڵ و شه‌وانیش ئارەزووە سێکسییه‌کانى خۆیانی پێ دامرکێننه‌وە." ئێوە دەبێت بزانن من شه‌وانه‌ چۆن دەستدرێژیم کردۆته‌ سه‌ر ژنه‌که‌م ، به‌ڵێ ژنه‌که‌م به‌ڵام من وەکوو سه‌گ په‌لامارمداوە و هه‌رچى پێى ناخۆش بووە پێم کردووە" ئه‌مه‌ش دان پێدانانێکى ئاشکراى که‌سایه‌تییه‌که‌یه‌ له‌ ئه‌نجامى هۆشیار بوونه‌وەیه‌تى، له‌لایه‌کى تر دڕندەیى مرۆڤ دەسه‌لمێنێت. له‌م چیرۆکه‌دا چیرۆکنووس باسى چه‌ندین نه‌خۆشى کۆمه‌ڵایه‌تى کردووە، که‌ هه‌ر یه‌که‌یان زیانێکى گه‌ورەیان له‌ تاک و کۆمه‌ڵگاى کوردیدا داوە. وەک پیاوسالارى (جه‌للادبوونى پیاو به‌رامبه‌ر خێزانه‌که‌ى)، هه‌ژاریى، گومانکردن، هه‌ژاریی عه‌قڵ. به‌ڕاستى ئه‌مانه‌ وا دەکه‌ن کۆمه‌ڵگا زیاتر به‌رەو دواوە بگه‌ڕێننه‌وە نه‌ک پێشه‌وە. پیاوسالارى له‌و ڕوانگه‌وەى که‌ دەبێته‌ هۆى ئه‌وەى هه‌رچى مافى سرەتایى ئافرەت هه‌یه‌ به‌ هه‌دەر بچێت و ته‌نانه‌ت وەکوو کۆیله‌ سه‌یریان بکرێت، ئه‌م عه‌قڵیه‌ته‌ تا ئێستاش له‌ناو کورددا بوونى هه‌یه‌ موریدى ماون. له‌ کۆمه‌ڵگاى پیاوسالاریدا وا دەکات که‌ پیاوەکه‌ هه‌ست به‌ دەسه‌ڵاتێکى گه‌ورە بکات و هه‌موو ئه‌وانه‌ى له‌گه‌ڵى دەژین (خێزانى، منداڵه‌کانى) وەکوو کۆیله‌ و خزمه‌تکار سه‌یر بکرێن. ئه‌مه‌ش وا دەکات که‌ پیاوەکه‌ هیچ به‌رنامه‌یه‌کى بۆ ژیان نه‌بێت. به‌ڕاى من ئه‌و که‌سانه‌ى دەیانه‌وێت ژیانى هاوسه‌ریى پێک بهێنن دەبێت سه‌رەتا له‌ ئافرەت بگه‌ن، بزانن ئافرەت چییه‌؟ ئایا کاڵایه‌، یان مرۆڤه‌؟ به‌ حوکمى ئه‌وەى (باران) خۆى ئافرەته‌، ئه‌وا جوانتر دەتوانێت له‌ کۆمه‌ڵگایه‌کى وەکوو کۆمه‌ڵگاى کوردى بڕوانێت له‌ ڕووى مافەکانى ژیانه‌وه‌، چونکه‌ ئه‌و خۆى نیشته‌جێى ئه‌وروپایه‌ و دەتوانێت ئه‌و جیاوازیانه‌ ببینێت که‌ له‌ نێوان ئافرەتى کورد و ئافرەتى ئه‌وروپییدا هه‌یه‌ له‌ ڕووى دابینکردنى مافه‌کانیانه‌وه‌، به‌راوردیان بکات توانیوییه‌تى وێنه‌ى واقیعى ڕەوشى ئافرەتمان له‌ کۆمه‌ڵگاى کوردییدا بۆ وێنا بکات. توانیوییه‌تى به‌ زیندوویى ئه‌و واقیعه‌مان پێشکه‌ش بکات. که‌سایه‌تى ناو چیرۆکه‌که‌ که‌ پله‌ى کۆمه‌ڵایه‌تى فه‌رمانبه‌رە و له‌ چینى هژارانه‌، که‌ مرۆڤێکه‌ خاوەنى هیچ پرۆژەیه‌ک نیییه‌ له‌ ژیاندا. هه‌رچه‌ندە فه‌رمانبه‌ر دەبێت پله‌یه‌کى خوێندندەوارى هه‌بێت مه‌به‌ستمان ئه‌وانه‌ن که‌ خاوەنی بڕوانامه‌ى سه‌رەتایى تا به‌کالۆریۆسن. که‌سایه‌تى ناو چیرۆکه‌که‌ خوێندەوارى هه‌یه‌، چونکه‌ له‌ یه‌که‌ى ژمێریارى کار دەکات. به‌ڵام پرسیارێک لێرەدا سه‌رهه‌ڵدەدات ئایا که‌سایه‌تى ناو چیرۆکه‌که‌ ئه‌و پله‌ خوێندەواریه‌ى هه‌یه‌ بۆچى له‌ ژیاندا بێ به‌رنامه‌ و عه‌قڵیه‌تێکى دواکه‌وتووى له‌و شێوەیه‌یه‌؟ وەڵامەکه‌ى زۆر ئاساییه‌ هه‌رچى کلتور و دابونه‌ریتى دواکه‌وتووى ناو کۆمه‌ڵگا هه‌یه‌ به‌درێژایى سه‌دان ساڵه‌ بۆمان ماوەته‌وە کاریگه‌رى له‌سه‌رى هه‌یه‌، مرۆڤه‌کانیش به‌هۆی نه‌بوونى هۆشیارییه‌وە ناتوانن خۆیان له‌و دابونه‌ریتانه‌ رزگار بکه‌ن. ئه‌م چیرۆکه‌ ڕەخنه‌یه‌کى توندە له‌ کۆمه‌ڵگاى کوردى که‌ تاکه‌کانى تاکوو ئێستا نه‌یانتوانیووە خۆیان له‌ قاڵبى دواکه‌وتووى ئه‌و دابونه‌ریتانه‌ رزگار بکات، ڕەخنه‌یه‌که‌ له‌و واقیعه‌ى تا سه‌ر ئێسقان مافه‌کانى ئافرەتى تێدا پێشێل کراوە. له‌م ڕێگه‌یه‌شه‌وە ئه‌و هۆکار و ئه‌نجامانه‌ش دیارى دەکات که‌ بوونه‌ته‌ هۆى ئه‌و واقیعه‌ دواکه‌وتووە، هۆکارى سه‌رەکى بۆ ئه‌م حاڵه‌ته‌ وەک گوتمان دابونه‌ریته‌. هۆکارێکى تر هه‌ژارییه‌، هه‌ژاریى واى له‌ که‌سایه‌تى ناو چیرۆکه‌که‌ کردووە که‌ تووشى گوناهى کۆمه‌ڵایه‌تى گه‌ورە ببێت ، یه‌کیان ئه‌وەیه‌ که‌ بێ به‌رنامه‌ خێزانى پێکهێناوە، وەک کاڵایه‌ک سه‌یرى خێزانه‌که‌ى دەکات، دووەمى ئه‌وەیه‌ که‌ تووشى دزى دەبێت، ئه‌ویش دزى له‌ حکومه‌ت که‌ جۆرێک له‌ گه‌ندەڵى دەگرێته‌وە، گه‌ندەڵى ئه‌و نه‌خۆشییه‌ گه‌ورەیه‌یه‌ که‌ تووشى هه‌ر میلله‌تێک ببێت وێرانى دەکات. چیرۆکنووس که‌ باس له‌م دەردە کۆمه‌ڵایه‌ تییه‌ دەکات و له‌وە ئاگادارمان دەکاتەوە که‌ هه‌ژاریى زۆر دەردى ترى به‌ دواوەیه‌ ، ئه‌گه‌ر سه‌یرى ساڵانى شه‌ڕى ناوەخۆى باشوورى کوردستان بکه‌ین له‌ نێوان ساڵانى(1994) تا کۆتایى نه‌وەدەکان به‌هۆى ئه‌و ئابلوقه‌ ئابوورییه‌ى له‌سه‌ر ناوچه‌که‌ هه‌بوو چ کارەساتێکى گه‌ورەى دروستکردبوو، سه‌دان تاوان ئه‌نجام دەدرا به‌هه‌موو جۆرەکانیه‌وە، ته‌نانه‌ت یاسایه‌ک نه‌بوو بۆ ڕێگرتن له‌م تاوانانه‌. نه‌خۆشییه‌کى ترى دەروونیى و کۆمه‌ڵایه‌تى که‌ چیرۆکنووس له‌م چیرۆکه‌دا ئیشى له‌سه‌ر کردووە گومانه‌. گومان دەبێته‌ هۆى تێکچوونى شیرازەى خێزان. ئه‌م نه‌خۆشییه‌ وا دەکات مرۆڤ هیچ کاتێک هه‌ست به‌ئارامى نه‌کات. ئه‌مه‌ش له‌ناو کۆمه‌ڵگاى کوردییدا به‌رێژەیه‌کى به‌رچاو بوونى هه‌یه‌" جا من هه‌میشه‌ به‌رامبه‌ر ژنه‌که‌م خاوەنى پیسترین دڵى دنیا بووم" بۆیه‌ دەکرێت گومان به‌ گه‌ورەترین مه‌ترسى بۆ سه‌ر خێزان له‌ قه‌ڵه‌م بدرێت. ئه‌وەى ئێمه‌ تێبینیمان کردووە ئه‌م چیرۆکه‌ باس له‌ واقیعى سه‌ردەمى شه‌ڕى ناوەخۆ دەکات، ئه‌و زەمه‌نه‌ى که‌ شه‌قامه‌کان بۆنى خوێنیان لێدەهات، که‌س نه‌بوو شه‌و به‌ ئاسوودەیى بخه‌وێت. په‌یامى چیرۆکنووس که‌ دەگاته‌ گێڕەرەوەى هه‌موو شتزان ئه‌وەیه‌ ئاگادارمان دەکاته‌وە له‌و نه‌خۆشییه‌ کۆمه‌ڵایه‌تیانه‌ پێمان دەڵێت ئه‌م نه‌خۆشیانه‌ چ به‌رەنجامێکیان لێ دەکه‌وێته‌وە ئه‌مه‌ش په‌یامێکى گرنگه‌.
لێرەدا ئه‌م چیرۆکه‌ ، چیرۆکه‌کانى (ئیبراهیم ئه‌حمه‌د و شاکر فتاح و محه‌مه‌د مه‌ولود مه‌م و ....)مان به‌بیر دەهێنێته‌وە که‌ باسیان له‌و نه‌خۆشییه‌ کۆمه‌ڵایه‌تییانه‌ دەکرد، ئه‌وەى جیاوازى دروست دەکات له‌گه‌ڵ چیرۆکه‌کانى ئه‌وان، ئه‌م چیرۆکه‌ به‌ ته‌کنینێکى نوێ و هونه‌رى تر نووسراوە. ئه‌گه‌ر نا وەکوو ناوەڕۆک هه‌مان ناوەڕکى چیرۆکه‌کانى ئه‌وانى هه‌یه‌، دەبوایه‌ چیرۆکنووس په‌یامه‌که‌ى به‌ شێوەیەکى تر و ته‌نانه‌ت ئه‌و شێواز و ته‌کنیکه‌ى به‌کاریهێناوە به‌شێوەیه‌کى پێشکه‌وتووتر به‌کاریهێنابا. به‌مه‌ش وایدەکرد هه‌م له‌ ڕووى ناوەڕکه‌وە و هه‌م له‌ ڕووى ته‌کنیک و شێوازەوە تۆکمه‌تر و جوانتر دەبوو. له‌لایەکى تر خه‌یاڵ له‌م چیرۆکه‌دا زۆر لاوازە ، زیاتر چیرۆکێکى واقیعییه‌ خه‌یاڵى تێدا که‌مه‌، بۆیه‌ دەبوایه‌ خه‌یالیش ڕۆلێکى زۆرترى پێ بدرابوایه‌ و زیاتر ڕەنگى بدایه‌ته‌وە. 

2010 







ئه‌م په‌ڕه‌یه‌ 2287 جار خوێندراوه‌ته‌وه‌
وته‌
پێویستمان بە دیالۆگی زیاترە، نەوەک مۆنۆلۆگی زیاتر.

/ستێفان گوننارسسۆن

ڤیدیۆ

خەڵکی کوێی کوردستانیت؟




ڕیکلام
Banner