ڕیکلام
Banner

Banner

Banner

Banner

درێژەی بابەتەکە

شه‌ڕ و سێكس و مه‌رگ له‌ دونیابینی شانۆی (سارا کەین)دا ~ نیهاد جامی

به‌شی: ئەوان
31 - 10 - 2017

سه‌یركردنمان بۆ تێكستی شانۆیی, زاده‌ی تێگه‌یشتنه‌ بۆ لۆژیكی درامی, به‌ڵام ئه‌و لۆژیكه‌ درامیه‌ ڕێسایه‌كی نیه‌ تاوه‌كو له‌وێدا جێگیر ببین و ئیدی ئه‌و لۆژیكه‌ له‌ناو ڕێسایه‌كی ده‌ست نیشان كراو بمێنێته‌وه‌, به‌تایبه‌ت ئه‌و ده‌مه‌ی ڕووبه‌رووی فۆڕمێكیتری نووسین ده‌بینه‌وه‌, ئه‌وه‌ وامان لێده‌كات له‌ئاستی جیاواز و له‌دنیابینی تێكسته‌وه‌ بێینه‌ ناو جیهانبینیه‌ شانۆییه‌كه‌وه‌, تێكسته‌ شانۆییه‌كانی سارا كه‌ین كه‌ پێنج شانۆنامه‌یه‌ و (باران) له‌ سویدییه‌وه‌ كردوویه‌تی بە كوردی, ڕووبه‌رووی ئه‌و تێگه‌یشتنه‌ شانۆییه‌مان بۆ تێكست ده‌كاته‌وه‌, كه‌ نووسین له‌ناو فۆڕمی تێكستی شانۆنامه‌ له‌چه‌ند ئاستێكی بیركردنه‌وه‌ی شانۆیی ده‌مانباته‌ ناو بونیادی زمانه‌وانی و ده‌لالی و پرسیاركردن له‌شوناسی ئه‌خلاقی زمان.

گه‌ر بپرسین نووسه‌ر كێیه‌؟ ناچینه‌ سه‌ر تێگه‌یشتنی نووسه‌ران بۆ وه‌ڵامی ئه‌و پرسیاره‌, هێنده‌ی به‌ره‌و ڕه‌وانیه‌كی ڕوونی پرسیار ده‌ڵێین نووسه‌ر ئه‌و ناوه‌ی ئیمزاكه‌ی ده‌چێته‌ سه‌ر تێكست, لێره‌دا ژنێكه‌ كه‌ پێنج شانۆنامه‌ ده‌نووسێت و دواتر خۆی ده‌كوژێت, دواهه‌مین شانۆنامه‌شی وه‌ك ده‌ستنووسی ته‌واو نه‌كراو به‌جێ‌ دێلێت, لێره‌وه‌ خوێندنه‌وه‌ی په‌یوه‌ندیی نێوان نووسه‌ر و تێكست هه‌میشه‌ ده‌یه‌وێت ئه‌و كه‌لێنی په‌یوه‌ندییه‌ به‌ خوێندنه‌وه‌ی بیۆگرافیانه‌ پڕ بكاته‌وه‌, كه‌ نووسه‌ر له‌ناو تێكست بڕیاری داوه‌ كه‌ خۆی بكوژێت, یاخود تێكستی خۆكوژی بنووسێت.
ئه‌و ده‌ره‌نجامانه‌ بڕیاری پێشووه‌خته‌ی خوێندنه‌وه‌ن, كه‌ پشت به‌ خوێندنه‌وه‌ی ژیاننامه‌ی نووسه‌ر ده‌به‌ستن, كه‌ چاره‌نووسی ڕاكردن بووه‌ له‌ یاده‌وه‌ریه‌ك كه‌ دۆخه‌ ده‌روونیه‌كه‌ی پاڵیناوه‌ به‌ره‌و خۆكوشتن, له‌هه‌ندێك تۆماری مێژوویی باس له‌و لاقه‌ كردنه‌ سێكسیه‌ی ده‌كرێت كه‌ له‌ته‌مه‌نێكی به‌راییه‌وه‌ له‌ناو خانه‌واده‌كه‌ی خۆی ڕووبه‌رووی بۆته‌وه‌.
ئه‌وانه‌ تۆماری مێژووین, ئێمه‌ فیلمی دیكۆمێنتاری له‌سه‌ر ژیانی نووسه‌ر درووست ناكه‌ین, تاپشت به‌و دیكۆمێنتانه‌ ببه‌ستین, به‌ڵكو ده‌مانه‌وێت له‌ناو بونیادی تێكسته‌وه‌ پرۆسه‌ی خوێندنه‌وه‌ و ئاسته‌كانی زمان و مانا بدۆزینه‌وه‌, بۆیه‌ به‌هیچ جۆرێك به‌ره‌و ژیاننامه‌ی نووسه‌ر ودیكۆمێنته‌كانی ئه‌و ژیاننامه‌یه‌ نایه‌ین, كارمان ته‌نها له‌گه‌ڵ تێكسته‌ و تێكستێكیش وه‌ك بونیادی زمانه‌وانی سه‌ربه‌خۆ سه‌یر ده‌كه‌ین, ئه‌وه‌ش له‌ده‌ره‌نجامدا ئێمه‌ ڕووبه‌رووی خوێندنه‌وه‌ی پێنج تێكستی شانۆیی ده‌كاته‌وه‌ كه‌ سارا كه‌ین نووسیویه‌تی.
شانۆگه‌ری “ته‌قینه‌وه‌كان” كاتێك ڕووداوه‌كانی له‌هاتنی ژن وپیاوێك بۆ ئوتێلێك ده‌یبینین, تێده‌گه‌ین له‌وه‌ی جه‌نگ به‌ته‌نیا جه‌سته‌ی مرۆڤه‌كان به‌ره‌و مه‌رگ نابات, هێنده‌ی مرۆڤ ته‌نیا ده‌كات, ته‌نیایی مرۆڤ له‌جه‌نگدا, دوورخستنه‌وه‌یه‌تی له‌ته‌واوی ئه‌و ئارامیه‌ ڕۆحیه‌, ژیانی ته‌سلیمی ساته‌وه‌ختێكی نادیار ده‌كات, ترس ونیگه‌رانیه‌كانی مرۆڤ, ڕۆیشتنه‌ به‌ره‌و مه‌رگ, مه‌رگێك ئه‌وان لێی ڕاده‌كه‌ن, كه‌چی بۆخۆیان له‌گه‌ڵ له‌ده‌رگادان مه‌ترسی ڕووبه‌روو بونه‌وه‌ی ده‌كه‌ن.

كه‌شی ئوتێله‌كه‌ وێنه‌ی ناخی ئه‌و مرۆڤانه‌یه‌ كه‌ به‌ره‌و ڕووی دێن, له‌بوونی سیسه‌مێك كه‌ بۆ خه‌وتن وئارامی نیه‌, هێنده‌ی بۆ ساته‌وه‌ختێكی سێكسیه‌, چونكه‌ هه‌موو موفره‌ده‌كانی تر به‌رزده‌بنه‌وه‌ به‌ره‌و لای ئه‌و پڕۆسه‌ سێكسیه‌, له‌بوونی “سیسه‌مێكی دوو كه‌سیی گه‌وره‌ی لێیه‌. باڕێكی بچكۆله‌ وبتڵێك شه‌مپانیا له‌ ده‌فرێكدا. ته‌له‌فۆنێك. چه‌پكێك گوڵی گه‌وره‌. دوو ده‌رگا- یه‌كێكیان ده‌چێته‌وه‌ سه‌ر ڕاڕه‌وی هوتێله‌كه‌ ئه‌وی تریان ده‌رگای گه‌رماوه‌” ته‌قینه‌وه‌كان/ سارا كه‌ین, وه‌رگێڕانی: باران, ده‌زگای چاپ وپه‌خشی سه‌رده‌م, 2016, لا 15
چه‌پكه‌ گوڵ وه‌ك ئاماژه‌یه‌ك بۆ خۆشه‌ویستی له‌ڕێگه‌ی سیمبولی دڵداری وه‌ك جوانی و بۆن, باڕێكیش بۆ ئه‌وه‌ی ئه‌و سیمبوله‌ به‌ره‌و مه‌ستی بیانبات و مه‌ست بوونێك به‌ سێكسكردن كۆتایی بێت, ئه‌وه‌ بۆ ورووژاندنی سێكس نیه‌, هێنده‌ی ناخی ترساوی كاره‌كته‌ره‌, له‌پێداویستیه‌كانی كه‌ له‌ڕێگه‌ی ترسه‌وه‌ ده‌یه‌وێت به‌جۆرێكیتر وێنای بوونی ترساوی خۆی بكات.
كرداری كاره‌كته‌ره‌كان له‌گه‌ڵ كه‌شی ژووره‌كه‌ كرده‌یه‌كی هارمۆنی ده‌خوڵقێنن, كه‌ ئه‌وان ئه‌و ڕاكردووانه‌ی ناو جه‌نگن, كه‌ هیچ چێژێك له‌ژیانیان بوونی نه‌ماوه‌, جگه‌ له‌گه‌ڕان وده‌رفه‌ت به‌دوای حه‌زه‌ ناخیه‌ په‌نگخواردووه‌كان, كه‌ ناخی كاره‌كته‌ر و دیمه‌نی ژووره‌كه‌ یه‌ك وێنه‌ی ئیرۆتیكی به‌رجه‌سته‌ ده‌كات.
ئیان هه‌ست ده‌كات جه‌سته‌ی بۆگه‌نی گرتووه‌, خێرا به‌ره‌و گه‌رماوه‌كه‌ ده‌ڕوات, ئه‌وه‌ پاككردنه‌وه‌ی جه‌سته‌یه‌ له‌پێناو بیركردنه‌وه‌و به‌ئه‌نجامگه‌یاندنی پڕۆسه‌یه‌كی سێكسی.
ئه‌وه‌ی له‌و سه‌ره‌تایه‌ جێگه‌ی تێڕامانه‌, مه‌یلی سێكسی وترسه‌ له‌ مه‌رگ ئه‌و دووانه‌ وه‌ك مۆتیڤێكی ناو دیمه‌نه‌كه‌ وێنای ته‌واوی بونیادی نه‌ستی كاره‌كته‌ر ده‌كه‌ن, بۆیه‌ ده‌مانچه‌كه‌ وه‌ك ده‌لاله‌تێكی ترس خۆی ده‌خاته‌ ڕوو.
ئێمه‌ له‌ فرۆیده‌وه‌ ئه‌وه‌ فێر بووین مرۆڤی تۆقیوو ئه‌و كه‌سه‌ ترساوه‌ی كه‌ به‌ فۆبیا ناوی ده‌بات, له‌ساتی هێرشكردندا بۆ ئه‌وه‌ هێرش ده‌كات, تا پارێزگاری له‌ناخی ترساوی خۆی بكات, واته‌ هێرشكردنی داكۆكیكردنه‌ له‌بوونی خۆی, ئیان له‌هه‌ستكردن به‌ نێرایه‌تی نیه‌ كه‌ ده‌مانچه‌كه‌ هه‌ڵده‌گرێت, به‌ڵكو ترس له‌مه‌رگ به‌ره‌و ئه‌و چه‌كه‌ی ده‌بات.


ئه‌و ترسه‌ به‌ته‌نیا له‌وانه‌ نیه‌ كه‌ هێزی چه‌كدارن, به‌ڵكو ترس له‌غه‌ریبه‌كان هۆكاری توڕه‌ییه‌تی, واته‌ ئه‌و حاله‌ته‌ فۆبیاییه‌ هێرشكردنی جه‌سته‌یی و ڕه‌مزیه‌, جه‌سته‌یی له‌ڕێگه‌ی به‌كارهێنانی ده‌مانچه‌ و ڕه‌مزیی له‌ڕێگه‌ی قسه‌كردن به‌غه‌ریبه‌كان “ڕقم له‌م شاره‌یه‌. بۆگه‌نی گووی لێ‌ دێت. دۆم وپاكستانی گرتویانه‌ته‌وه‌” ته‌قینه‌وه‌كان, لا 18
مه‌یلی سێكسی كاره‌كته‌ر به‌ره‌نجامی سه‌رسامی وخۆشه‌ویستی نیه‌, هێنده‌ی ترس له‌ته‌نیایی ده‌یه‌وێت ئه‌و كاره‌ی بۆ ئه‌نجام بدات, ئه‌وه‌ شكستی خودی كاره‌كته‌ره‌ كه‌ ڕێگا نادات شتێك ڕوو بدات خۆی بۆ كیت ڕووت ده‌كاته‌وه‌, كیت كه‌ گۆشتی به‌راز ناخوات ڕه‌نگه‌ سه‌خت بێت له‌ گۆشتی جه‌سته‌ی ئه‌و بۆ ورووژاندنی سێكسی بخوات, ئه‌وه‌ بۆ كیت هیچ مه‌یلێكی سێكسی تیا نیه‌, هێنده‌ی وێنه‌یه‌كی كاریكاتۆریه‌ “ئیان سه‌یری جله‌كانی خۆی ده‌كات ده‌چێته‌ ئه‌و لاوه‌, هه‌موو جله‌كانی داده‌كه‌نێت و به‌ڕووتی له‌به‌رده‌میدا داده‌نیشێت) بیخه‌ ده‌مته‌وه‌. (كه‌یت ده‌حه‌په‌سێت. پاشان ده‌ست ده‌كات به‌پێكه‌نین) ئیان: نایكه‌ی؟ نا. چونكه‌ بۆنم ناخۆشه‌؟ (كه‌یت ئه‌وه‌نده‌ی تر پێده‌كه‌نێت) ئیان خه‌ریكه‌ جله‌كانی له‌به‌ر ده‌كاته‌وه‌, به‌ڵام له‌شه‌رمه‌زاریدا, به‌هه‌ڵه‌ قۆپچه‌كان داده‌خات, جله‌كانی كۆ ده‌كاته‌وه‌ وده‌چێت له‌گه‌رماوه‌كه‌ خۆی ده‌گۆڕێت” ته‌قینه‌وه‌كان, لا 22
كیت له‌دۆخێكی ده‌روونیدایه‌ و توانای سێكسكردنی نیه‌ له‌گه‌ڵ ئیان, بۆیه‌ خۆی لێ‌ به‌دوور ده‌گرێت, ئه‌و خۆ به‌دوورگرتنه‌ بۆ ئیان وه‌ك ئازارێك وایه‌, ئه‌وه‌ هۆكارێكه‌ كه‌ هه‌رچۆنێك بێت ده‌ستی كیت ده‌باته‌ ناوگه‌ڵی خۆی تا داده‌مركێته‌وه‌.

لێره‌دا ئه‌و وێنه‌یه‌ بۆ مه‌یلی سێكسی له‌لای كیت ته‌واو له‌ناو ترس و ئازارێك كاڵبۆته‌وه‌, نووسه‌ر ئه‌و وێنه‌یه‌ ناخاته‌ ناو وێنه‌یه‌كی مه‌جازی زمان و ده‌لاله‌تێكی هونه‌ریه‌وه‌, هێنده‌ی وه‌ك وێنه‌یه‌كی سرووشتیانه‌ی سێكسی ناو ژیان ده‌نووسێته‌وه‌, سێكس له‌و وێنه‌یه‌دا له‌نزمه‌ منی بگۆ دێته‌ ناو ئاخاوتن, ئه‌و وێنه‌یه‌ په‌رده‌ له‌سه‌ر ده‌مامكه‌ ئه‌خلاقیه‌كانی كاره‌كته‌ر لاده‌بات, كه‌ سێكس نه‌كردن و نه‌بوونی مه‌یل له‌لای كیت بۆ ئیان, دوو نهێنیمان بۆ ده‌خاته‌ ڕوو, یه‌كێكیان ئه‌وه‌یه‌ كه‌ پێشتر ئه‌وان پێكه‌وه‌ خه‌وتوون, ئێستا بۆ ئاماده‌ی ئه‌وه‌ی تیا نیه‌؟ ئاخۆ ئه‌و نه‌خه‌وتنه‌ په‌یوه‌ندیی به‌وه‌وه‌ هه‌یه‌ كیت په‌یمانی به‌ كاره‌كته‌رێكی نادیار داوه‌ به‌ناوی شاون كه‌ ئیتر هی ئه‌و بێت؟ ئایا شاون هۆكاره‌ یاخود دۆخێكی ده‌روونی هۆكاره‌؟ یا نهێنیه‌كه‌ له‌كوێدایه‌؟
ئێمه‌ بۆ ئه‌وه‌ی بگه‌ین به‌وه‌ڵامی ئه‌و پرسیاره‌ له‌سه‌ر دوو ئاست ده‌وه‌ستین, یه‌كه‌میان ئه‌وه‌یه‌ كه‌ كیت ئێستا شاون له‌ژیانیه‌تی ئه‌وه‌ هۆكارێكه‌ كه‌ ڕێگا به‌خۆی نادات له‌گه‌ڵ ئیان بخه‌وێت “كیت: من چیتر ده‌زگیرانی تۆ نیم” لا 31
تائێره‌ دۆخێكی سرووشتیه‌, كه‌ ئه‌وه‌ هۆكاری نه‌خه‌وتن بێت, به‌ڵام لێره‌دا ڕووبه‌رووی ئه‌و پرسیاره‌ ده‌بینه‌وه‌ گه‌ر وایه‌ بۆ له‌گه‌ڵی هاتووه‌ تا له‌ ئوتێل بمێنێته‌وه‌؟ ئێمه‌ له‌سه‌ره‌تاوه‌ ئه‌وان وه‌ك دوو خۆشه‌ویست ده‌بینین, ئیان ووته‌نی بۆ ده‌یرووژێنێت كه‌ نایه‌وێت له‌گه‌ڵی بخه‌وێت؟
هه‌ڵبه‌ت كیت ڕاستگۆیه‌ له‌وه‌ی بۆ ماچی كردووه‌, به‌ڵام ئه‌و ماچه‌كه‌ بۆ ئه‌وه‌ ده‌گه‌ڕێنێته‌وه‌ كه‌ خۆشی ویستووه‌, لێره‌دا خۆشه‌ویستی خۆی بۆ ئیان ناشارێته‌وه‌, هه‌ر به‌و هۆیه‌شه‌وه‌ ماچی كردووه‌, كه‌چی له‌گه‌ڵیشی ناخه‌وێت به‌ بیانوی ئه‌وه‌ی ئێستا په‌یمانی به‌كه‌سێكیتر داوه‌و ده‌زگیرانی ئه‌وه‌, ئه‌وه‌ش ئه‌وه‌مان بۆ ده‌خاته‌ ڕوو كه‌ كیت سه‌رباری ئه‌وه‌ی هه‌ست به‌ته‌نیایی ده‌كات و ده‌یه‌وێت له‌ڕێگه‌ی دوو په‌یوه‌ندیی خۆشه‌ویستیه‌وه‌ هه‌ست به‌ دڵنیایی بكات, له‌هه‌مانكاتدا تووشی دووفاقی كه‌سێتی هاتووه‌ به‌وه‌ی دوو په‌یوه‌ندیی وه‌ك ته‌واوكردنی هه‌سته‌ سۆزداریه‌كانی خۆی ده‌یبینێت.
بوونی ئه‌و كه‌سێتیه‌ دووفاقیه‌ په‌یوه‌سته‌ به‌دۆخی ده‌روونی كاره‌كته‌ره‌كان, وه‌ك له‌په‌یوه‌ندیه‌ به‌رده‌وامه‌كانی ئیان هه‌ستی پێده‌كه‌ین, زمان له‌و ساته‌دا هێشتا نزمتر ده‌بێته‌وه‌, ئاخاوتن زمان ڕووت ده‌كاته‌وه‌ له‌حه‌قیقه‌تی بوونی كاره‌كته‌ر, بۆیه‌ هه‌ریه‌كه‌یان له‌سه‌ر هاوڕه‌گه‌زبازی ده‌یانه‌ویًت پرسیار له‌وه‌ی تر بكه‌ن, كه‌ تاچه‌ند ئه‌و كاره‌یان له‌ژیاندا ئه‌نجامداوه‌.

لێره‌وه‌ ته‌واوی دیمه‌نه‌كه‌ ده‌چێته‌ سه‌ر وێنه‌یه‌كی ئیرۆتیكیانه‌ و خاڵی ده‌بێته‌وه‌ له‌سه‌ر ماناكانی عه‌شق, هێنده‌ی ئیرۆتیكای جه‌سته‌ ده‌بێته‌ تاكه‌ پاڵنه‌رێك بۆ قسه‌كردن له‌خۆشه‌ویستی و هۆگربوون به‌ویتر.

ئه‌وه‌ له‌پاڵ مه‌رگ ده‌بنه‌ مۆتیڤێك كه‌ سه‌ره‌نجام وه‌ك دوالیزمی سێكس و مه‌رگ ته‌واوی ئه‌و دیمه‌نه‌ داگیر ده‌كه‌ن, هه‌میشه‌ ئه‌و دوو كاره‌كته‌ره‌ ده‌بنه‌وه‌ دوالیزمی یه‌كتری (سێكس/ مه‌رگ), (خۆشه‌ویستی/ خۆشنه‌ویستن), (بوون/ نه‌بوون), (حه‌ز/ ڕق لێبوونه‌وه‌).
مانه‌وه‌یان له‌شه‌ودا ده‌ریده‌خات كه‌ كیت له‌لایان ئیان لاقه‌كراوه‌, لاقه‌كردنێك به‌پێی مه‌یله‌ سێكسیه‌كانی ئیان ئه‌نجامدراوه‌ كه‌ ئازارێكی ته‌واوی به‌ كیت به‌خشیووه‌, ئه‌وه‌ بۆ كیت وه‌ك توندوتیژیه‌ك كاریگه‌ریه‌كه‌ی ده‌ركه‌وتووه‌ نه‌وه‌ك وه‌ك مه‌یلێك بۆ چێژ وله‌زه‌ت, چونكه‌ ئه‌و لاقه‌كردنه‌ به‌درێژایی ئه‌و شه‌وه‌ به‌چه‌ندین شێوه‌ دووباره‌ بۆته‌وه‌.
كه‌یت: ناتوانم میز بكه‌م. هه‌ر خوێن دێت.
ئیان: ئاو زۆر بخۆره‌وه‌.
كیت: پیساییش ناكه‌م. دێشێت.
ئیان: به‌م زوانه‌ چاك ده‌بێت. لاپه‌ڕه‌ 54

توندوتیژیی وه‌ك به‌شێكی سه‌ره‌كی له‌شانۆنامه‌كانی سارا كه‌ین

جه‌نگ لاقه‌كردن و برسێتی وه‌ك ئاكارێكی ژیان وێنا ده‌كات, بۆیه‌ هاتنی سه‌ربازه‌كه‌ بۆ ناو ژووری ئوتێله‌كه‌ بۆ خۆی ئه‌و وێنه‌یه‌ نیشان ده‌دات, كه‌ سه‌ربازه‌كه‌ و ئیان ئیتر سه‌ر به‌یه‌ك ئه‌خلاقی بیركردنه‌وه‌ن, دوو مرۆڤی تۆقیو له‌ژیان ئیان په‌لاماری جه‌سته‌ی كیت ده‌دات, سه‌ربازه‌كه‌ش په‌لاماری گۆشتی به‌راز ده‌دات تا بیخوات.
ئه‌و برسێتیه‌ ترسی مه‌رگه‌ له‌وه‌ی ژیان له‌ده‌ست بدات, بۆیه‌ ئاسته‌كانی چێژ زه‌وت ده‌كات, تاوه‌كو له‌ده‌ستی نه‌چێت, وه‌ك چۆن سه‌ربازه‌كه‌ باس له‌وه‌ ده‌كات كه‌ چۆن سواری ئافره‌ته‌كان بووه‌, به‌واتای ئیان و سه‌رباز سه‌ر به‌یه‌ك سیستمی ئه‌خلاقین, نێربوونیان ڕه‌وایه‌تی و چه‌ك و لاقه‌كردنیان پێده‌دات, ئه‌وان حه‌ز به‌یه‌كیش نه‌كه‌ن هه‌ر یه‌كه‌یان ئه‌ویتر به‌دوژمنی خۆی بزانێت سه‌ره‌نجام یه‌ك بیركردنه‌وه‌و سیستمی ئه‌خلاقی كۆیان ده‌كاته‌وه‌.
كوشتن و سێكس له‌لای سه‌رباز سه‌ر به‌ئاره‌زووی تاڵانكارین, بۆیه‌ وه‌ك وێنه‌یه‌كی تاڵانكردنی ئه‌ویتر ده‌یبینێت, كه‌ هیچ به‌هایه‌كی نیه‌, ئه‌وه‌ له‌لای نووسه‌ر چه‌نده‌ هۆكاری شه‌ڕه‌ هێنده‌ش ئه‌وه‌ نێره‌كانن سه‌ر به‌و هێزه‌ تاڵانكاریه‌ن.
سه‌ره‌نجام ده‌یانه‌وێت خراپه‌كاریه‌كانیشیان وه‌ك پاڵه‌وان بوون سه‌یر بكرێت, پاڵه‌وانێكی گوناهباری بێگوناه, وه‌ك له‌لای سه‌ربازه‌كه‌ ده‌یبینین كه‌ داوا له‌ ئیان ده‌كات مادام ئه‌و ڕۆژنامه‌نووسه‌ بۆچی باسی چیرۆكه‌كانی ئه‌و ناكات له‌ ڕۆژنامه‌دا, له‌هه‌مان كاتدا ئیان هه‌ندێك چیرۆكی تر باس ده‌كات, كه‌ هه‌مان وێنه‌ن, به‌ڵام باس له‌نهێنی سێكسی ناو جه‌نگ ناكات.
دیدی ساره‌ كه‌ین بۆ سێكس و مه‌رگ و شه‌ڕ ته‌واو نزیكه‌ له‌كتێبه‌ ده‌روونشیكاریه‌كه‌ی فرۆید له‌و سیانه‌یه‌, تێگه‌یشتنه‌كانی بۆ مه‌رگ و سێكس ڕوانینێكی شه‌ڕخوازانه‌یه‌, نه‌ك له‌وه‌ی هێزه‌ سیاسی و گروپه‌ چه‌كداره‌كان ئه‌نجامه‌ی ده‌ده‌ن, به‌ڵكو شه‌ڕ وه‌ك ئه‌و ئه‌خلاقه‌ وێرانكاریه‌ی ناخی مرۆڤ كه‌ ته‌واو دنیای یه‌كتریان پڕ كردووه‌ له‌ وێرانكردن.
رووداوه‌كان وه‌ك یه‌كن, له‌سه‌رووی هه‌ر یه‌كێكه‌وه‌ ده‌سه‌ڵاتێكیتر هه‌یه‌, ئه‌وه‌ ئه‌خلاقی شه‌ڕه‌, ئیان كه‌ شه‌وی ڕابردوو به‌ ده‌مانچه‌یه‌كه‌وه‌ كیت ناچار ده‌كات كه‌ سێكسی له‌گه‌ڵ بكات, ئێستا به‌هه‌مان شێوه‌ سه‌ربازه‌كه‌ سێكس له‌گه‌ڵ ئیان ده‌كات.
سێكس كه‌ بازنه‌ی ناو ڕووداوه‌كانی شانۆنامه‌كه‌ی داگیر كردووه‌, به‌ڵام چه‌قی ئه‌و بازنه‌یه‌ سێكس نیه‌, به‌ڵكو شه‌ڕه‌, شه‌ڕ تیره‌یه‌كی بۆ مه‌داری بازنه‌كه‌ كێشاوه‌ به‌ سێكس.
ئه‌و بازنه‌یه‌كه‌ له‌نێوان سێكس و شه‌ڕ, پانتایی مه‌رگه‌, مه‌رگێك له‌سه‌ر خۆ كه‌ به‌ئه‌شكه‌نجه‌ی جۆراو جۆر ته‌واو ده‌بێت, سه‌ربازه‌كه‌ هه‌ردوو چاوه‌كانی ئیان ده‌خوات, لێره‌وه‌ ئیان ده‌بێته‌ كوێرێك, به‌ڵام كوێریی له‌ئه‌ده‌بیاتی كلاسیكدا به‌تایبه‌ت له‌لای ئۆدیب كاردانه‌وه‌یه‌كی ئه‌خلاقیه‌ له‌ ئاشكرا بوونی تاوان, كه‌چی لێره‌دا گه‌یشتنه‌ باڵای لوتكه‌ی شه‌رانگێزیه‌تیه‌, وێنه‌یه‌كی سادیانه‌ بۆ جه‌سته‌ی ئه‌ویتر بنیات ده‌نێت.
مرۆڤه‌كان چه‌نده‌ خوڵقێنه‌ری كاره‌ساتن, سه‌ره‌نجام ساته‌وه‌ختێك هه‌یه‌ هه‌ست به‌خراپی خۆیان بكه‌ن, سه‌ربازه‌كه‌ وه‌ك پاڵه‌وان خۆی وێنا ده‌كات, له‌كۆتاییه‌كانی دیمه‌نی سێیه‌مدا ئێمه‌ ئه‌و وه‌ك مرۆڤێكی سادی ده‌بینین, ئیان وه‌ك ماسۆشیه‌ك, به‌هۆی ئه‌وه‌ی ڕازی نیه‌ باس له‌و مرۆڤه‌ سادیه‌ بكات له‌ناو ڕۆژنامه‌دا ئه‌و كاره‌ش ڕووبه‌رووی لاقه‌كردن و ده‌ركردنی چاوه‌كانی ده‌كاته‌وه‌.
كه‌چی ئه‌و وێنه‌ توندوتیژیه‌ له‌سه‌ره‌تای دیمه‌نی چواره‌م ده‌چێته‌ ئاستێكیتره‌وه‌, ئاستێكی ئه‌خلاقی تیایدا پاڵه‌وان هه‌ست ده‌كات هیچ نیه‌, جگه‌ له‌ مرۆڤێكی گاڵته‌جار, ئه‌و گاڵته‌جاربوونه‌ی كردوویه‌تیه‌ پاڵه‌وانی كاریكاتۆریی, كه‌ كێی ویست ده‌یكوژێت لاقه‌ی ده‌كات ئه‌تكی ده‌كات, به‌ڵام دوای ئه‌وانه‌ چی؟ هه‌ر ئه‌وه‌یه‌ وای له‌سه‌ربازه‌كه‌ كردووه‌ له‌سه‌ره‌تای دیمه‌نی نوێ‌ به‌ ده‌مانچه‌كه‌ خۆی كوشتبێت و مێشكی له‌ناو ژووره‌كه‌ ڕژابێت.
دیمه‌نی سێیه‌م ئه‌گه‌رچی هه‌مان ئوتێله‌, به‌ڵام له‌ڕاستیدا هاوتاكردنه‌وه‌ی دنیای ده‌ره‌وه‌ی ئوتێله‌كه‌یه‌, چونكه‌ ئیتر كیت له‌وێ‌ نادۆزرێته‌وه‌, بۆیه‌ ئه‌و دنیایه‌ هاوتاكردنه‌وه‌یه‌ به‌ ده‌ره‌وه‌, به‌واتایه‌كیتر شوێنێك نیه‌ ئارام بێت بۆ مرۆڤ, هه‌موو شوێنه‌كان هه‌ڵگری ده‌لاله‌تی مه‌رگه‌.
ئوتێل كه‌ ته‌نیا شوێنی موسافیره‌و سبه‌ینێ‌ به‌جێی دێلێت, به‌ڵام لێره‌دا ئه‌و شوێنه‌ له‌ ده‌لاله‌تێكی واقعیه‌وه‌ ده‌چێته‌ سه‌ر ده‌لاله‌تێكی ڕه‌مزیی, ڕووداوه‌كان هه‌ر له‌وێ‌ به‌بێ‌ كیت ڕوو ده‌ده‌ن, پرسیاره‌كه‌ ئه‌وه‌یه‌ ئه‌و جه‌نگه‌ بۆ هێنده‌ درێژه‌؟ ئه‌ی ئه‌وه‌ نیه‌ كاتێك سه‌ربازه‌كه‌ خۆی كوشتووه‌ و ئیان كوێركراوه‌, كیت به‌ مناڵێكه‌وه‌ دێته‌وه‌.
ئه‌و سه‌ره‌تایه‌ هه‌وڵی ئیانه‌ بۆ خۆكوشتن, به‌ر له‌وه‌ی بیر له‌وه‌ بكه‌ینه‌وه‌, ئاخۆ ئه‌و مناڵه‌ خه‌ونی ئاینده‌ی مرۆڤه‌كانه‌, مناڵه‌كه‌ ده‌مرێت, دیمه‌نه‌كه‌ به‌ره‌و قوڵایی كۆتاییه‌كی سریالیانه‌ هه‌نگاومان پێ‌ ده‌هاوێت.

دیمه‌نی پێنجه‌م و كۆتایی, كۆتایی هاتنه‌ به‌هه‌ر ده‌لاله‌تێكی واقعی, به‌وه‌ی شوێن پانتایی بوونه‌, بۆیه‌ مناڵه‌ مردووه‌كه‌ له‌ژووره‌كه‌ ده‌نێژرێت, ململانێكه‌ له‌و دوالیزمه‌ی ده‌گۆڕدرێته‌ سه‌ر (كوێریی/ برسیه‌تی) كه‌ هه‌ردووكیان له‌سه‌ر سێكس كۆده‌بنه‌وه‌, كیت برسیه‌تی ناچاره‌ بچێته‌ ده‌ره‌وه‌ جه‌سته‌ی خۆی ببه‌خشێته‌ سه‌ربازه‌كان تا له‌برسیه‌تی ڕزگاری بێت, ئیان كوێرو نابینایه‌, بیر له‌خۆبه‌تاڵكردن ده‌كاته‌وه‌ و په‌نا ده‌باته‌ به‌ر ده‌ستی خۆی, ئه‌و ده‌ستانه‌ی له‌ناو گه‌ڵیه‌تی دوای خاوبوونه‌وه‌ ده‌یه‌وێت خۆی پێبكوژێت.
ناتوانێت ئه‌و كاره‌ بكات.. خۆی پیس ده‌كات.. باوه‌ش به‌ سه‌ربازه‌ مردووه‌كه‌ ده‌كات.. گۆڕه‌كه‌ هه‌ڵده‌كه‌نێت.. له‌گۆشتی منداڵه‌ مردووه‌كه‌ ده‌خوات.. كیت دێته‌وه‌ خواردن و خواردنه‌وه‌ی هێناوه‌, ده‌زووله‌ی خوێن به‌ناو ڕانیدا دێته‌ خواره‌وه‌, هه‌مان وێنه‌ی سێكس و مه‌رگ ئه‌و كۆتاییه‌ داگیر ده‌كات, به‌ڵام له‌دنیایه‌كی بیكیتیانه‌ زیاتر نزیكه‌, له‌و هه‌موو جوله‌ و ڕووداوه‌ بێهوده‌ییانه‌ی ئه‌نجامی ده‌دات, ئه‌گه‌رچی هێشتا سه‌رباری دلًڕه‌قی ئیان له‌لاقه‌كردن و سرووشت له‌كوژرانی مناڵه‌كه‌ی و ڕزگاربوون له‌برسێتی له‌لایان سه‌ربازه‌كانه‌وه‌ له‌ڕێی ئه‌و هه‌موو ئازاره‌ جه‌سته‌یی و توندوتیژیه‌, كه‌چی هێشتا سۆزو میهره‌بانی به‌رجه‌سته‌ ده‌كات و “كه‌ له‌نانپێدانی ئیان ده‌بێته‌وه‌, به‌ چیچكانه‌وه‌ بۆ گه‌رمی, كه‌مێك له‌ولایه‌وه‌ داده‌نیشێت, له‌ جنه‌كه‌ ده‌خواته‌وه‌, په‌نجه‌ی ده‌مژێت” لاپه‌ڕه‌ 88
سوپاسكردنی له‌لایان ئیان و بارینی باران سه‌ره‌تایه‌كیتره‌, سه‌ره‌تایه‌كی نادیار, سه‌خته‌ شته‌كان وه‌ك خۆیان لێبێته‌وه‌, گه‌ر ئه‌و كۆتاییه‌ بۆ كۆتایی هاتنی جه‌نگ بێت, ئاخۆ چی له‌ژیانێك بكه‌ین, پیاوه‌كان لاقه‌كران و چاویان كوێركرا و ژنه‌كان به‌قه‌د ژماره‌ی سه‌ربازه‌كان په‌لامار دران و ڕووبه‌رووی ئه‌شكه‌نجه‌ كرانه‌وه‌, ئایا ئه‌وه‌ بێمانایی بوونی مرۆییمان نیه‌ له‌لای سارا كه‌ین وه‌ك ته‌قینه‌وه‌كانی بوونمان؟ یان كۆتاییه‌كه‌ بۆ ماناكانی ژیاندۆستی و خراپه‌كاری هه‌موو شتێكی لێ‌ پیس كردین و بوونی خۆمانی لێ‌ زه‌وت كردین؟ ئه‌وه‌ كاره‌ساتی سه‌ره‌كی و ماڵوێرانی ئێمه‌یه‌ له‌و دنیایه‌ كه‌ مه‌رگ له‌ڕێگه‌ی شه‌ڕ وسێكسه‌وه‌ بۆی به‌رهه‌مهێناین.
ئه‌و تێگه‌یشتنه‌ فرۆیدیه‌, به‌ناو تێكستی تردا درێژ ده‌بێته‌وه‌, به‌تایبه‌ت له‌شانۆنامه‌ی “ئه‌ڤینی فایدرا” كه‌ گه‌ڕانه‌وه‌یه‌ بۆ ئه‌فسانه‌ی ئۆدیب, ئه‌وه‌ش له‌تێگه‌یشتنی فرۆیده‌وه‌ ده‌یه‌وێت ئه‌وینی كوڕ و دایك وه‌ك گرێیه‌كی مرۆڤی مۆدێرن بخاته‌ ڕوو, ئه‌وه‌ی له‌م شانۆنامه‌یه‌دا ده‌رده‌كه‌وێت هۆگری ژنه‌ بۆ كوڕی هاوسه‌ره‌كه‌ی دوای ئه‌وه‌ی شووی پێكردووه‌و كه‌ ده‌بینێت كوڕی پیاوه‌كه‌ نه‌خۆشی سێكسی هه‌یه‌, هه‌رچه‌نده‌ كچه‌كه‌ی خۆی ئامۆژگاری ده‌كات, به‌ڵام ژنه‌كه‌ (فایدرا) ئه‌ڤینی خۆی بۆ كوڕ (هیپۆلیتۆس) ناشارێته‌وه‌.


سارا كه‌ین نایه‌ت سه‌رله‌نوێ‌ ئه‌فسانه‌ی ئۆدیب بنووسێته‌وه‌, هه‌ڵبه‌ت نووسینه‌وه‌ ئه‌نجام نادات, هێنده‌ی مه‌یلی سێكسی ئۆدیب بۆ بنیاتی كاره‌كته‌ر لای هیپۆلیتۆس ده‌خوڵقێنێت, له‌هه‌مانكاتدا به‌هه‌مان ئه‌و مه‌یله‌ سێكسیه‌ بونیاتی كه‌سێتی فایدرا ده‌كات, بۆیه‌ گفتوگۆكانی كوڕ له‌گه‌ڵ باوه‌ژنه‌كه‌ی له‌ سنووری سێكس ده‌رناچێت, ئه‌و وێناكردنه‌ی په‌یوه‌ندیه‌ له‌باره‌ی سێكسه‌وه‌ وای كردووه‌ ئه‌ده‌بی كه‌ین وه‌ك ئه‌ده‌بی لۆرانس له‌ناو سێكسدا بیبینین, به‌ڵام ئه‌ده‌بێك له‌ده‌ره‌وه‌ی زمانێكی بارگاویی به‌ ده‌مامك و یان مه‌جاز و ده‌لاله‌تی هونه‌ری, هێنده‌ی زمان گێڕانه‌وه‌ی چیرۆكێكه‌ به‌شێوه‌یه‌كی ساده‌ وه‌ك ئه‌وه‌ی له‌ژیاندا ڕوو ده‌دات.
ئه‌و دوو مرۆڤه‌ مه‌یلیان بۆ سێكس وه‌ك یه‌كتریه‌, به‌ڵام ئامانجیان ته‌واو جیاوازه‌ فایدرا له‌سێكسدا ده‌یه‌وێت خۆشه‌ویستی وه‌ده‌ست بێنێت, هه‌رچی هیپۆلیتۆسه‌ ته‌نیا مه‌به‌ستی تێپه‌ڕینی ڕۆژه‌كانه‌, كرده‌ی سێكسیش وه‌ك فایدرا به‌ درێژكردنه‌وه‌و وابه‌سته‌كردنی په‌یوه‌ندیی نابینێت, هێنده‌ی وه‌كو مه‌رگی زمان و په‌یوه‌ندیی سه‌یری ده‌كات.

“هیپۆلیتۆس: ئه‌گه‌ر جووت بین, ئیتر هه‌رگیز قسه‌ له‌گه‌ڵ یه‌كتر ناكه‌ینه‌وه‌.
فایدرا: من له‌وانه‌ نیم.
هیپۆلیتۆس: به‌ڵام من وام” ئه‌ڤینی فایدرا/ سارا كه‌ین, وه‌رگێڕانی: باران, ده‌زگای چاپ وپه‌خشی سه‌رده‌م, 2016, لا 27
ئه‌و ئه‌وینه‌ی فایدرا مه‌یلێكی پڕ له‌سێكس و ڕووبه‌رووی جه‌سته‌ی زڕ كوڕه‌كه‌ی ده‌بێته‌وه‌, كوڕ هه‌رچه‌نده‌ نه‌یه‌وێت ئه‌وه‌ ڕوو بدات, به‌ڵام ئه‌و نه‌ك تام له‌جه‌سته‌ی وه‌رده‌گرێت, به‌ڵكو ده‌یه‌وێت دووباره‌ش ببێته‌وه‌.
په‌یوه‌ندیی فایدرا و كچه‌كه‌ی (سترۆف) به‌ هیپۆلیتۆس په‌یوه‌ندیه‌كی سێكسی ڕوونه‌ كه‌ هه‌ریه‌كه‌یان له‌وه‌ده‌ست كه‌وتنی ئه‌ودا بوونه‌, سه‌ره‌نجام كه‌ ده‌ستیان نه‌كه‌وتووه‌, بێئومێد بوونه‌, ئه‌وه‌ به‌ پلانێكی دایك (فایدرا) ده‌چێته‌ بازنه‌یه‌كی سێكسی ئه‌خلاقیه‌وه‌, به‌وه‌ی وا بڵاو ده‌كاته‌وه‌ كه‌ هیپۆلیتۆس لاقه‌ی كردووه‌.
له‌هه‌مووی سه‌یرتر ئه‌وه‌یه‌ هه‌ردووكیان پێی ده‌ڵێن وه‌ك باوكتی, ئه‌و ده‌سته‌واژه‌یه‌ ده‌ریده‌خات په‌یوه‌ندیی ژنه‌كان به‌پیاوه‌كان له‌ماڵ هه‌وڵدانه‌ بۆ وه‌ده‌ست كه‌وتنی سێكس, چونكه‌ كچه‌كه‌ی فایدرا هه‌وڵی داوه‌ له‌گه‌ڵ هاوسه‌ری دایك سێكس بكات, ئه‌وه‌ش دواتر له‌ده‌یالۆگێكیتردا ته‌واو ئه‌و گومانه‌مان ده‌بێته‌ یه‌قین “هیپۆلیتۆس: به‌ڵێ‌. ئاماژه‌م به‌وه‌ش كرد كه‌ تۆ له‌گه‌ڵ مێرده‌كه‌یدا بوویت” ئه‌ڤینی فایدرا, لاپه‌ڕه‌ 36
كاتێك سترۆف بابه‌تی لاقه‌كردن به‌ هیپۆلیتۆس ده‌ڵێت ئێمه‌ له‌به‌رده‌م مه‌عریفه‌ی زانینی ڕووداوێك نین, كه‌ زمان ببێته‌ هۆكارێك بۆ تێگه‌یشتن, به‌ڵكو زمان ده‌بێته‌وه‌ ناوه‌ندێكی ترازاو كه‌ سه‌خته‌ مرۆڤه‌كان بیانه‌وێت سه‌رباری ساده‌بوونه‌وه‌ بتوانن له‌یه‌كتری تێبگه‌ن.
ئه‌و له‌یه‌كتر تێنه‌گه‌یشتنه‌ بۆمان ده‌خاته‌ ڕوو, كه‌ فایدرا له‌و ئه‌وینه‌ بێسووده‌دا نه‌یتوانیووه‌ به‌رده‌وام بێت, بۆیه‌ خۆی له‌سێداره‌ داوه‌, بۆ ئه‌وه‌ی هیپۆلیتۆس بیگوناه له‌و كاره‌ ده‌رنه‌چێت, كاغه‌زێكی جێهێشتووه‌, گوایه‌ هۆكاری خۆكوشتنی ئه‌و بووه‌ چونكه‌ لاقه‌ی كردووه‌.
لێره‌دا ئێمه‌ ڕووبه‌رووی قوربانیه‌كی ئه‌و ئه‌ڤینه‌ ده‌بینه‌وه‌, قوربانیه‌كی عاشق, كه‌ شێتانه‌ تا ئاستی مه‌رگ عه‌شقێكی ویستووه‌, عه‌شقێك به‌هیچ شێوه‌یه‌ك له‌ئاستی كۆمه‌ڵایه‌تی قبووڵ كراو نه‌بێت, به‌ڵام له‌ئاستی ئیرۆتیكیدا مافێكی ڕه‌وای فایدرایه‌, به‌بێ‌ ئه‌وه‌ی ئه‌وه‌مان بیر بچێت, ئێمه‌ له‌به‌رده‌م گوناهبارێكی بێگوناهداین.
كچ و قه‌شه‌ هه‌ردووكیان ده‌یانه‌وێت كوڕ نكوڵی له‌و تاوانه‌ بكات, تاوه‌كو له‌زیندان ئازاد بێت, چونكه‌ ئازاد نه‌بوونی ده‌بێته‌ هۆی له‌ده‌ستدانی عه‌رشی پاشایه‌تی, به‌هۆی ئه‌وه‌ی ئه‌وی شازاده‌ لاقه‌ی باوه‌ژنه‌كه‌ی كردووه‌, كه‌چی ئه‌و تاكه‌ كه‌سێكه‌ كه‌ ئاماده‌ نیه‌ بڵێت ئه‌و كاره‌م نه‌كردووه‌.
له‌هه‌موو ئه‌مانه‌ سه‌یرتر ئه‌وه‌یه‌ چاره‌سه‌ری درامیه‌كه‌ی ئه‌و دیمه‌نه‌ی نێوان هیپۆلیتۆس و قه‌شه‌ ئه‌ویش به‌ چاره‌سه‌رێكی سێكسی به‌هه‌مان وێنه‌ی فایدرا ته‌واو ده‌بێت, بۆ ئه‌وه‌ی قه‌شه‌ بڵێت منیشی لاقه‌ كرد, به‌ڵام ئه‌و وێنه‌ نائه‌خلاقیه‌ سه‌یره‌ هه‌مان دیدی كامۆییانه‌ی كالیگۆلامان بیر دێنێته‌وه‌, كه‌ بۆچی سێكس سه‌ر له‌نوێ‌ به‌بێ‌ هیچ هۆكارێك ده‌یه‌وێت وێنه‌یه‌كی نائه‌خلاقی به‌و كاره‌كته‌ره‌ ببه‌خشێت؟
له‌ڕاستیدا پرسیاری له‌م چه‌شنه‌ ده‌كرێت ببردرێته‌ ئاستی گومانه‌وه‌, چونكه‌ نووسه‌ر مه‌به‌ستیه‌تی ئه‌و فه‌زا سێكسیه‌ بكاته‌ ده‌روازه‌ی تێگه‌یشتن له‌بونیادی درامی شانۆنامه‌كانیدا, بۆیه‌ ئه‌و دیده‌ كامۆییه‌ هه‌مان دیدگای سارا كه‌ین بۆ شانۆنامه‌ ده‌یخوڵقێنێته‌وه‌, كه‌ سێكس ته‌واوی دنیابینی وجیهانبینی كاره‌كته‌ر داگیر ده‌كات و دیمه‌نه‌ شانۆییه‌كان به‌ مژینی چۆكی كوڕ ده‌باته‌ لوتكه‌.
ته‌نانه‌ت كاتێك حه‌شاماته‌كه‌ كۆ ده‌بنه‌وه‌ بۆ كووشتنی, دیسان چاره‌سه‌ره‌كان ململانێكه‌ به‌كوشتنی سێكس ته‌واو ناكه‌ن, چونكه‌ كوشتنی كوڕ كۆتایی هاتنه‌ به‌و ده‌نگۆی لاقه‌ سێكسیه‌, به‌ڵام له‌هه‌مووی سه‌یرتر ئه‌وه‌یه‌ هه‌ندێك تاوانه‌كانیان ده‌رنه‌كه‌وتووه‌ بۆیه‌ بێگوناهن, له‌نمونه‌ی باوك (تیسیوس) ده‌نا ئه‌و له‌گه‌ڵ كچی هاوسه‌ره‌كه‌شی سێكسی كردووه‌, كچ (سترۆف) له‌گه‌ڵ هیپۆلیتۆس به‌هه‌مان شێوه‌.

 

باوك ده‌ستی ناچێته‌ كوشتنی كوڕه‌كه‌ی, چونكه‌ ده‌زانێت ئه‌و گوناهباره‌ به‌ گوناهه‌كانی خۆی, ئه‌وه‌ش سه‌ر له‌نوێ‌ ململانێكه‌ ده‌باته‌وه‌ ناو سێكس, ئه‌و ده‌مه‌ی سترۆف ناهێلێت هیپۆلتۆس بكوژن, كه‌چی هیپۆلتۆس به‌به‌رچاوی خه‌ڵكه‌كه‌وه‌ لاقه‌ی ده‌كات.
ئه‌وه‌ دڵنیاكردنه‌وه‌ی خه‌ڵكه‌ كه‌چۆن كچه‌كه‌ی لاقه‌ كرد ئاواش دایكه‌كه‌ی لاقه‌ كردووه‌, به‌تایبه‌ت دوای لاقه‌كردنی ملی ده‌بڕێت “سترۆف: تیسیوس. هیپۆلیتۆس بێتاوانه‌. دایه‌. ئۆ دایه‌” ئه‌ڤینی فایدرا, لاپه‌ڕه‌ 53
كچ له‌سه‌ره‌ مه‌رگدا دایك به‌گوناهبار ناوده‌بات, ئه‌وه‌ش ئه‌و ڕاستیه‌مان بۆ ده‌خاته‌ ڕوو كه‌ كچ وه‌ك دایك عاشقی هیپۆلتۆس بووه‌, عه‌شقێك تیایدا ئه‌وان ده‌بنه‌ قوربانی و ده‌یه‌وێت عاشقه‌كه‌ی خۆی و دایكی به‌زیندوویی بمێنێته‌وه‌.


ئه‌وه‌ كۆمه‌كی ڕزگار بوونی ناكات, وه‌ك چۆن خۆشی نایه‌وێت ئازاد بێت, ئه‌و ده‌مه‌ی به‌ئه‌شكه‌نجه‌وه‌ جه‌سته‌ی ده‌بڕن و سووكایه‌تی پێده‌كه‌ن, به‌هاتنی پۆلیسه‌كان واته‌ كۆتایی ڕووداوه‌كه‌, به‌ڵام كۆتاییه‌كه‌ له‌و وێنه‌یه‌ ته‌واو نابێت, به‌ڵكو ئه‌وه‌ كۆتایی عه‌رش و ده‌سه‌ڵاتیشه‌, ئه‌ویش به‌هۆی هه‌ستی گوناهباری باوك (تیسیوس) له‌به‌رده‌می ته‌رمی كچدا دانبه‌وه‌ ده‌نێت كه‌ ئه‌وی نه‌ناسیوه‌ته‌وه‌, ده‌نا ڕێی به‌ لاقه‌كردن و كوشتنی نه‌ده‌دا, وه‌ك چۆن ئه‌و ڕقه‌ی ململانێی نێوان باوك و كوڕ, بۆ هیپۆلیتۆس نیشان ده‌دات, ئه‌و كۆتاییه‌ كۆتایی هاتنی عه‌رشی ده‌سه‌ڵاتی سێكسوالێتی خانه‌واده‌ییه‌ كه‌ له‌ڕێی مه‌رگی هه‌مووانه‌وه‌ ته‌واو ده‌بێت, داڵی لاشه‌خۆر له‌جه‌سته‌ی هیپۆلیتۆس ده‌خوات, ئه‌وه‌ بوونه‌ یاده‌وه‌ری و كۆتایی هاتنه‌ به‌ ده‌سه‌ڵاتی سێكسی ئه‌وان, ده‌سه‌ڵاتێك پڕ له‌ سێكس, كه‌ هه‌مان پڕۆژه‌ به‌رده‌وامیه‌كه‌ی نووسینه‌ لای سارا كه‌ین له‌نێوان “شه‌ڕ وسێكس و مه‌رگ”
له‌شانۆنامه‌ی “ڕزگار بوو” ئه‌و سیانه‌یه‌ ده‌چنه‌ ناو ئاستێكیتره‌وه‌, به‌هۆی ئه‌وه‌ی قسه‌ له‌دۆخێكی به‌رایی ژیانی مرۆڤ ده‌كات, كۆمه‌ڵه‌ گه‌نجێك له‌زانكۆیه‌كدان, شوێن باخچه‌ی زانكۆیه‌, به‌ڵام له‌ڕاستیدا له‌زانكۆ ناچێت هێنده‌ی له‌نه‌خۆشخانه‌یه‌كی ده‌روونی یان زیندانێكی مرۆڤه‌ ئاڵوده‌بووه‌كان ده‌چێت, لێره‌دا شوێن ده‌لاله‌تێكی مه‌جازیانه‌ به‌خۆی ده‌به‌خشێت كه‌ ڕووبه‌ری كۆكردنه‌وه‌ی لاوانه‌ بۆ مه‌عریفه‌, به‌ڵام له‌شوێنی مه‌عریفه‌ ئه‌فیوون بوون ئه‌وان داگیر ده‌كات, ئه‌وه‌ سه‌ره‌تای ترسه‌ له‌خۆشه‌ویستی و چوونی هه‌ندێكیتره‌ به‌ره‌و خۆشه‌ویستی, ئه‌و دامه‌زراوه‌ بۆ خۆی مه‌عریفه‌ وه‌ك جۆره‌ ئه‌فیوونێك ده‌خاته‌ ڕوو, لێره‌دا ئه‌و وێنه‌ مه‌جازیه‌ی زانكۆ وه‌ك شوێنی ئاڵووده‌ بوون و بیركردنه‌وه‌ له‌ده‌ره‌وه‌ی ئه‌و سیستمه‌ ئاماده‌بوونی هه‌یه‌.
نه‌ك هه‌ر هێنده‌, به‌ڵكو سڕكردنی مرۆڤه‌كان و ڕووتكردنه‌وه‌یان و گۆڕینی پۆشاكیان و شاردنه‌وه‌ی دۆسیه‌ی مردووه‌كان وه‌ك به‌شێكیتری ئه‌و دامه‌زراوه‌, زانكۆ وه‌ك دامه‌زراوێكی مۆدێرن ڕووبه‌رووی ترسمان ده‌كاته‌وه‌ له‌دنیای مۆدێرن.
گره‌یس هاتووه‌ هه‌واڵی گراهه‌می برای بزانێت, كه‌چی پێی ده‌ووترێت كه‌ ئه‌و مردووه‌ و كاتێك داوای پۆشاكی براكه‌ی ده‌كات ده‌بینێت له‌به‌ری ڕۆبینه‌, له‌پۆشینی پۆشاكی براكه‌ی وه‌ك گراهه‌می لێدێت, لێره‌دا له‌ڕوویه‌كه‌وه‌ مه‌سه‌له‌ی ژێنده‌ر له‌و بابه‌ته‌ ده‌خرێته‌ ڕوو كه‌ پۆشاك هۆكاری لابردنی ڕه‌گه‌زی وجیاوازیه‌كانیه‌تی.
له‌ڕوویه‌كی تریشدا ئه‌وه‌ ئه‌و ئه‌خلاقه‌ی دنیای مۆدێرنه‌ كه‌ فه‌یله‌سووفێكی وه‌كو میشێل فۆكۆ له‌ كتێبی “چاودێری و سزا” باس له‌وه‌ ده‌كات پۆشاك وه‌زیفه‌ به‌كاره‌كته‌ر ده‌به‌خشێت, داری ده‌ستی پۆلیس و به‌ڕێوبه‌ری نه‌خۆشخانه‌كان وه‌ك دوو پڕۆسه‌ و ده‌سه‌ڵات ناو ده‌بات.
لێره‌دا ئه‌و نمونه‌ فۆكۆییه‌ ته‌واو ده‌سه‌پێت, به‌هۆی ئه‌وه‌ی شوێن به‌شی نه‌خۆشی سیلی زانكۆكه‌یه‌, تینكه‌ر كه‌ له‌سه‌ره‌تای شانۆنامه‌كه‌ هیرۆین گه‌رم ده‌كات و ده‌یدات به‌ گراهه‌م موماره‌سه‌ی پزیشك ده‌كات وه‌ك ده‌سه‌ڵات, كاتێك گره‌یس جل وبه‌رگی برا مردووه‌كه‌ی له‌به‌ر ده‌كات ئه‌ویش وه‌ك نه‌خۆشی لێدێت به‌هۆی پۆشینی جل وبه‌رگه‌وه‌, دیسان تینكه‌ر وه‌ك ده‌سه‌ڵات مامه‌له‌ ده‌كات, لێره‌دا زانكۆ په‌یوه‌ندیی ده‌سه‌ڵاتێكه‌ به‌ مه‌عریفه‌, كه‌ به‌نده‌ له‌سه‌ر سه‌ركوتكردن و زه‌وتكردنی خواستی ئه‌وانیتر.
ده‌سه‌ڵات ده‌بێته‌ مه‌عریفه‌ی سه‌ركوتكردن, زانكۆش ناوه‌ندێك ده‌بێت بۆ مه‌عریفه‌ی ده‌سه‌ڵات, ئه‌و تێگه‌یشتنه‌ فۆكۆییه‌ بۆ ده‌سه‌ڵات ومه‌عریفه‌ به‌ته‌واوی له‌ناو ئه‌و شانۆنامه‌یه‌دا ڕه‌گ داده‌كوتێت.
ئه‌و ده‌سه‌ڵاته‌ له‌بنه‌ڕه‌تدا جه‌سته‌ وه‌ك ئۆرگانێك بۆ بوون سه‌یر ده‌كات, كه‌ فۆكۆ له‌به‌رگی یه‌كه‌می سیانه‌ی “مێژووی سێكسوالێتی” به‌ناوی “ئیراده‌ی مه‌عریفه‌” ئه‌وه‌ ناوی ده‌بات به‌ “ئیتیكا” زانكۆ لێره‌دا گرفتی گه‌وره‌ی له‌گه‌ڵ ئیتیكا هه‌یه‌, تینكه‌ر نوێنه‌ری ڕاسته‌قینه‌ی ده‌سه‌ڵاتی زانكۆیه‌, بۆ ئه‌وه‌ی جه‌سته‌ توانای خوڵقاندنی بوونی نه‌بێت, دێت كارڵ به‌هه‌موو شێوه‌یه‌ك ئه‌شكه‌نجه‌ ده‌ده‌ن و دوا قسه‌كردنیشی دانپیانه‌كه‌یه‌تی به‌عه‌شق و كۆتایی هاتنه‌ به‌ زمان له‌ڕێگه‌ی بڕینی زمانی, به‌واتای ئه‌و موستیله‌یه‌ی كه‌ كارڵ به‌دڵخۆشیی و سووربوونه‌وه‌ ڕۆد گۆڕیه‌وه‌ ئیدی ده‌بێت بزانێت ئه‌وه‌ وه‌ك مه‌رگێكی مه‌جازی وایه‌ “تینكه‌ر مقه‌ستیكی گه‌وره‌ ده‌هێنێت, زمانی كاڕڵ ی پێ‌ ده‌بڕێت. كاڕڵ په‌ل ده‌هاوێژێت, ده‌می پڕه‌ له‌ خوێن, هیچ ده‌نگی نایه‌ت. تینكه‌ر موستیله‌كه‌ی په‌نجه‌ی ڕۆد داده‌كه‌نێت و ده‌یخاته‌ ده‌می كاڕڵ ه‌وه‌, تینكه‌ر: قووتی بده‌. كاڕڵ مووستیله‌كه‌ قووت ده‌دات” ڕزگار بوو/ سارا كه‌ین, وه‌رگێڕانی: باران, ده‌زگای چاپ وپه‌خشی سه‌رده‌م, 2016, لا 23
ئێمه‌ دواتر ده‌زانین و ده‌بینین كه‌وا گراهه‌م زیندووه‌و نه‌مردووه‌, ته‌نانه‌ت له‌گه‌ڵ گره‌یس ده‌رده‌كه‌وێت, ئه‌وه‌ش ئه‌و درۆیه‌ی ده‌سه‌ڵاته‌ ده‌یكات بۆ ئه‌وه‌ی ئه‌وانیتریش كۆنتڕۆڵی ژێر سیستمه‌كه‌ی خۆی بكات, لێره‌دا له‌و شوێنه‌دا كه‌ په‌یوه‌ندیی سرووشتی نێوان ڕه‌گه‌زه‌كان سه‌ركوتده‌كرێته‌وه‌, له‌هه‌مان كاتدا ئێمه‌ ئه‌وان ده‌بینین به‌یه‌كه‌وه‌ سێكس ده‌كه‌ن, ئه‌و سێكسكردنه‌ گه‌ڕانه‌ به‌دوای ئیتیكا بۆ هه‌ستكردن به‌ بوون و دڵنیابوون له‌وه‌ی مه‌رگ داگیری نه‌كردوون, شه‌ڕ بریتیه‌ له‌و هێزه‌ی ده‌سه‌ڵات كه‌ په‌یوه‌ندیه‌كانی نێوان شوێن زانكۆ (نه‌خۆشخانه‌) و دكتۆره‌كانی ده‌یخوڵقێنن.
گره‌یس به‌سزای سێكسكردن له‌گه‌ڵ براكه‌یدا ڕووبه‌رووی ئه‌شكه‌نجه‌ ده‌بێته‌وه‌, چونكه‌ ده‌زگاكانی سه‌ركوتكردنه‌وه‌ وایان كردووه‌ هه‌موو چاودێربن به‌سه‌ر ئه‌و دیسپلینه‌ ئه‌خلاقیه‌, زانكۆ ئه‌و دامه‌زراوه‌ی موماره‌سه‌ی ده‌سه‌ڵات ده‌كات, له‌ڕووی ڕه‌مزیه‌وه‌ بۆمان ده‌رده‌كه‌وێت ده‌سه‌ڵاتێكه‌ بۆ خوڵقاندنی سزا, فۆكۆ ئه‌وه‌ی فێركردین په‌یوه‌ندیی نێوان (كۆنتڕۆڵ/ سزا) په‌یوه‌سته‌ به‌ دامه‌زراوه‌كانی ده‌سه‌ڵات, كه‌چۆن مرۆڤه‌كان ڕووبه‌رووی ئه‌شكه‌نجه‌ ده‌كاته‌وه‌, كۆنتڕۆڵكردنی گراهه‌م به‌سزادانی گره‌یس ته‌واو ده‌بێت.
كاڕڵ نموونه‌ی مرۆڤێكی ڕاستگۆیه‌, بۆیه‌ وه‌ك قوربانیه‌كی سه‌ره‌كی له‌به‌رده‌م ده‌سه‌ڵات ده‌وه‌ستێته‌وه‌, له‌لایه‌ك هه‌وڵێكی زۆر ده‌دات تا ده‌زگیرانه‌كه‌ی وه‌ده‌ست بێنێت, له‌ڕوویه‌كیتردا زمان بڕینیشی ناتوانێت وای لێبكه‌ن ده‌ست له‌ عه‌شقه‌كه‌ی هه‌ڵبگرێت, ئه‌وه‌ هۆكارێكه‌ بۆ ئه‌وه‌ی ئه‌و له‌به‌رده‌م سزایه‌كی به‌رده‌وامدابێت و هه‌ر جاره‌ی به‌شێكی جه‌سته‌ی ڕووبه‌رووی ئه‌شكه‌نجه‌ وله‌ناوچوون ببێته‌وه‌.
سێكس له‌ناو ئه‌و ڕووبه‌ره‌ی ده‌سه‌ڵاتدا چالاكیه‌كی ئۆرگانی له‌زه‌ت به‌خش نیه‌, هێنده‌ی ئۆرگانێكی ئه‌شكه‌نجه‌ندانه‌, سزایه‌كه‌ بۆ ئه‌وانیتر, سێكس وه‌ك فۆڕمێكی لاقه‌كردن ئه‌شكه‌نجه‌یه‌كه‌ له‌به‌رده‌م ئه‌واندا, بۆیه‌ قامچی و سێكس له‌و ساته‌وه‌خته‌دا یه‌ك مانایان هه‌یه‌ ئه‌ویش به‌خشینی زه‌بروزه‌نگه‌ به‌ویتر, ئه‌و سێكسه‌ی كه‌ بۆ له‌زه‌ت و خۆشه‌ویستیه‌ سزاكه‌ی مه‌رگه‌ وه‌ك له‌ سێكسكردنی ڕۆد و كاڕڵ ده‌یبینین.

بۆیه‌ سێكس وه‌ك بابه‌تی جیاوازی ڕه‌گه‌زی هه‌وڵێكه‌ بۆ كووشتنی ماناكانی له‌زه‌ت و له‌زه‌ت له‌ سێكس سزاكه‌ی ئه‌شكه‌نجه‌دانه‌, كه‌ به‌پێی پله‌كانی سزا له‌ بڕینه‌وه‌ی ئه‌ندامه‌كانی جه‌سته‌وه‌ تا ده‌گات به‌ بڕینه‌وه‌و نه‌شته‌رگه‌ریكردن بۆ ئه‌ندامه‌ سێكسیه‌كانی بۆ ئه‌وه‌ی چیتر وه‌ك ژن نه‌بینرێت, ئه‌وه‌ ترسناكترین وێنه‌ی ناو ئه‌و شانۆنامه‌ییه‌ كه‌ ژنه‌كان ئه‌ندامه‌ سێكسیه‌كانی جه‌سته‌یان ده‌بڕدرێته‌وه‌, ئه‌و ئه‌ندامانه‌ی كه‌ چێژ به‌پڕۆسه‌ی سێكسی ده‌به‌خشن, چیتر خاوه‌نی نینه‌ و وه‌كو پیاو وان.


تینكه‌ر كه‌ نوێنه‌ری ئه‌و ده‌سه‌ڵاته‌یه‌ بۆ سه‌ركوتكردنه‌وه‌, كه‌چی بۆخۆی له‌ودیو سه‌ركوتكردنه‌وه‌ مه‌یلێكی فانتازیانه‌ی سادیانه‌ی هه‌یه‌, كه‌ له‌گه‌ڵ ڕه‌گه‌زی خۆیدا وه‌ك هاوڕه‌گه‌زبازێك ده‌رده‌كه‌وێت, ئه‌وه‌ش وێنه‌ ڕاسته‌قینه‌كه‌ی ده‌سه‌ڵاتی مه‌عریفه‌ی ئه‌و دامه‌زراوه‌یه‌ كه‌ وه‌ك هاوڕه‌گه‌زباز وێناكراوه‌ته‌وه‌.
لێره‌دا مه‌رگ و شه‌ڕ ئه‌و دوانه‌یه‌ن, كه‌ مه‌رگ وه‌ك سزایه‌ك بۆ سێكس ده‌رده‌كه‌وێت, بۆ ئه‌وه‌ی كۆنتڕۆڵی ناو دامه‌زراوه‌كانی بكات, شه‌ڕیش شه‌ڕی ڕه‌گه‌زیه‌, هه‌وڵدانه‌ بۆ نه‌هێشتنی جیاوازی ڕه‌گه‌زی, تاوه‌كو سێكس له‌ له‌زه‌ته‌وه‌ بگۆڕدرێته‌ سه‌ر پێویستی و به‌ ئامێربوونی ویسته‌كانی مرۆڤ, نه‌ك هه‌وڵدان بێت بۆ دۆزینه‌وه‌ی ئیتیكای خۆشه‌ویستی.
گرفتی زمان زۆرجار ڕووبه‌رووی كاره‌كته‌ره‌كانی نێو شانۆنامه‌كانی سارا كه‌ین ده‌بێته‌وه‌, به‌ڵام به‌هیچ شێوه‌یه‌ك به‌و به‌دگومانی و ناتێگه‌یشتنه‌ نه‌كه‌وتوونه‌ته‌وه‌, وه‌ك ئه‌وه‌ی له‌شانۆنامه‌ی “تینووێتی” ڕووبه‌رووی كه‌سێتیه‌كان بۆته‌وه‌, كه‌ له‌به‌رگی دواوه‌ی وه‌رگێرانه‌ كوردیه‌كه‌ نووسراوه‌ “كارێكی جیاوازه‌ و قسه‌كه‌ره‌كان تیایدا كاره‌كته‌ر نین, به‌ڵكوو ڕۆڵن. ڕۆڵه‌كان بۆ كێ‌ قسه‌ ده‌كه‌ن وئاراسته‌ی باسه‌كانیان ڕوو له‌ كوێیه‌؟ ئاشكرا نییه‌” تینووێتی/ سارا كه‌ین, وه‌رگێڕانی: باران, ده‌زگای چاپ وپه‌خشی سه‌رده‌م, 2016


ئه‌و تێگه‌یشتنه‌ بۆ ئه‌و تێكسته‌ به‌ر له‌خوێندنه‌وه‌ ڕامانده‌كێشێته‌ ناو بونیادی ده‌نگی ڕۆڵه‌كان, به‌ڵام نه‌بوونه‌ به‌ سیمای كاره‌كته‌ر, به‌واتای خه‌سڵه‌ته‌كانی كاره‌كته‌ر تیایدا وونن, پێویسته‌ جۆره‌ كاره‌كته‌رێك هه‌بێت تا بتوانین خه‌سڵه‌تی تایبه‌تی كه‌سێتیه‌كان بناسین, هه‌ڵبه‌ت گه‌ڕان به‌ناو دیالۆگه‌كان نه‌ك كارێكی زیره‌كانه‌ نیه‌, به‌ڵكو ئه‌و په‌ڕی بێماناییه‌, چونكه‌ ئه‌گه‌ر به‌شی كۆتایی ئه‌و چه‌ند دێره‌ی به‌رگی دواوه‌ی شانۆنامه‌كه‌ وه‌ربگرینه‌وه‌ كه‌ ده‌ڵێت “ده‌كرێت لێكدانه‌وه‌یه‌كی نمایشه‌كه‌ ئه‌وه‌ بێت كه‌ ئه‌و ڕۆڵانه‌ له‌سه‌ر ته‌خته‌ی شانۆ بگه‌ڕێن بۆ نووسه‌رێك بیانووسێته‌وه‌” هه‌مان سه‌رچاوه‌
ئه‌و بۆچوونه‌ خه‌یاڵمان به‌ره‌و شانۆنامه‌كه‌ی براندیللۆ ده‌بات له‌ژێر ناوی “شه‌ش كاره‌كته‌ر به‌دوای نووسه‌رێك ده‌گه‌ڕێن” به‌ڵام گرفتی ئێمه‌ له‌و تێكسته‌ی كه‌ین ئه‌وه‌یه‌ كه‌ ئه‌وانه‌ كاره‌كته‌ریش نین, بۆیه‌ پووچیه‌ ده‌یالۆگه‌كان كۆ بكه‌ینه‌وه‌ سه‌ر یه‌كتری تاسیمای كاره‌كته‌ریان بۆ بدۆزینه‌وه‌.
كۆی ده‌یالۆگه‌كان فۆڕمێكی ئه‌بسێردانه‌ به‌زمانی شانۆنامه‌كه‌ ده‌به‌خشێت, ئه‌وه‌ پووچگه‌رایی زمانه‌ له‌ساته‌وه‌ختێكدا كه‌ توانای گوزارشت كردنی نامێنێت, كه‌ پێشتر یۆژین یۆنسكۆ له‌شانۆنامه‌ی “وانه‌” زۆر به‌ڕوونی ئه‌و گرفته‌ ده‌خاته‌ ڕوو.
ئێمه‌ كاتێك له‌ناو ده‌یالۆگی شانۆنامه‌ی “تینوویه‌تی” دا له‌گه‌ڵ ڕۆڵه‌كان هه‌نگاو ده‌نێین, تێده‌گه‌ین ئه‌وه‌ كۆمه‌ڵێك ده‌نگی یاده‌وه‌ری نووسه‌ره‌, به‌ڵام گرفتی ئه‌وه‌یه‌ كه‌ ئه‌و مرۆڤانه‌ كێن؟ چ سیمایه‌كیان هه‌یه‌؟ ئایا ئه‌وانه‌ به‌رهه‌می ساته‌وه‌خت و خه‌ونێكی نه‌ستی نین, كاتێك به‌ ئاگا دێینه‌وه‌ ئه‌وه‌ی له‌یادمانماوه‌ كۆمه‌ڵه‌ ده‌نگێكه‌, به‌ڵام كه‌سێتیه‌كان ناناسینه‌وه‌, نازانین ئه‌وان كێ‌ بوون؟ چۆن ڕه‌فتاریان ده‌كرد؟ ئه‌وه‌ی هه‌یه‌ ته‌نیا ده‌نگی ناو خه‌ونه‌كه‌مانه‌.
ده‌نگه‌كان وه‌ك بونیادی نه‌ستی عه‌قڵی نووسه‌ر ده‌رده‌كه‌ون, وه‌ك چۆن ئه‌و ده‌نگانه‌ی هه‌میشه‌ ترسی له‌عه‌قڵی ئه‌و درووست كردووه‌و بوونه‌ته‌وه‌ نه‌ستی زمانی قسه‌كردن له‌سه‌ر پڕۆسه‌ی نووسین ڕه‌نگیداوه‌ته‌وه‌.
هه‌ڵبه‌ت مه‌سه‌له‌ی ژێنده‌رو سێكس ئه‌و دوو بابه‌ته‌ گرنگه‌ن له‌ناو شانۆنامه‌كه‌دا به‌تایبه‌ت ئه‌گه‌ر ده‌نگه‌كان له‌سه‌ر شانۆ به‌چوار ئه‌كته‌ری ژن ببینین, ئه‌و كاته‌ جیاوازی ڕه‌گه‌زی نێوان نێر ومێ‌ نامێنێت, كاتێك ئه‌كته‌ری ژن نوێنه‌رایه‌تی ده‌نگ وجه‌سته‌ی پیاویش ده‌كات.
ئه‌وان له‌شوێنێكی نادیارن, شوێن كه‌ له‌لای نووسه‌ر هیچ كاتێك وه‌ك خۆی نامێنێته‌وه‌, ناگۆڕێت كه‌چی گۆڕاوه‌, بۆیه‌ نادیاری ئه‌و شوێنه‌ش ڕێك له‌ شێتخانه‌یه‌ك ده‌چێت و چوار ژنی نه‌خۆشی ده‌روونی گرتبێته‌ خۆی.
ده‌نگه‌كان په‌یوه‌ندیه‌ك له‌گه‌ڵ ئه‌ویتر درووست ده‌كه‌ن, بۆ ئه‌وه‌ی بیانه‌وێ‌ نزیكی و چیرۆكێك بخوڵقێنن, كه‌چی له‌ڕاستیدا هیچ په‌یوه‌ندیه‌ك به‌یه‌كه‌وه‌یان نابه‌ستێته‌وه‌, وه‌ك چۆن هه‌ر یه‌كه‌یان خاوه‌نی چیرۆكێكه‌, كه‌چی له‌بنه‌ڕه‌تدا هیچ چیرۆكێك نیه‌ بیگێڕنه‌وه‌, جگه‌ له‌و ده‌نگانه‌ی یاده‌وه‌ری كه‌ كۆمه‌ڵه‌ ترسێكن له‌ده‌ره‌وی سیستمێكی ڕێكخه‌ری زمان باس ده‌كرێن.

له‌بونیادی كۆنه‌ستی ده‌نگه‌كان, مێژوویه‌كی نادیار هه‌یه‌ نه‌ك هی ئه‌وان نیه‌, گریمانه‌یه‌كه‌ له‌هه‌ندێك ساتدا ده‌گه‌ڕێته‌وه‌ بۆ به‌ر له‌دایك بوونی ئه‌وان, ئه‌وه‌ش ئه‌و چیرۆكانه‌یه‌ كه‌ وه‌ك حیكایه‌تی زاره‌كی بیستوویانه‌ و دواتر وه‌ك به‌شێك له‌بوونی سه‌ركوتكراوی خۆیان باسی ده‌كه‌ن “به‌نێو مه‌زاری گوڵاله‌ سووره‌كاندا ڕامكرد, له‌پشت باخه‌كه‌ی بابه‌ گه‌وره‌مه‌وه‌. كه‌ له‌ده‌رگای چێشتخانه‌كه‌وه‌ ڕامكرد, بینیم لای دایه‌ گه‌وره‌مه‌وه‌ دانیشتبوو. لێوه‌كانی ماچ ده‌كرد وسنگی ده‌گرت. سه‌ریان هه‌ڵبڕی و منیان بینی. به‌ شڵه‌ژانه‌كه‌م پێكه‌نین. كاتێك دوای زیاتر له‌ ده‌ساڵ ئه‌مه‌م بۆ دایكم گێڕایه‌وه‌, به‌سه‌رسوڕمانه‌وه‌ لێی ڕوانیم و پێی ووتم ئه‌م ڕووداوه‌ به‌سه‌ر تۆدا نه‌هاتووه‌, ئه‌وه‌ به‌سه‌ر مندا هات. پێش ئه‌وه‌ی تۆ له‌دایك ببیت, باوكم مرد. كه‌ ئه‌وه‌ ڕوویدا من به‌تۆ دووگیان بوو بووم, به‌ڵام من تا ڕۆژی ناشتنی باوكم به‌وه‌م نه‌زانیبوو” تینووێتی/ سارا كه‌ین, وه‌رگێڕانی: باران, ده‌زگای چاپ وپه‌خشی سه‌رده‌م, 2016 , لاپه‌ڕه‌ 13
ئه‌و ده‌نگانه‌ هه‌ست به‌ شه‌ڕ ده‌كه‌ن, هه‌ستێك مه‌ترسیانه‌ له‌مه‌رگ, بۆیه‌ “سێكس و شه‌ڕ و مه‌رگ” ئه‌و سیانه‌ن یان ئه‌و هه‌ڕه‌می سێگۆشه‌ فرۆیدیه‌ن كه‌ سارا كه‌ین له‌ هه‌ڕه‌مێكی سێگۆشه‌ییه‌وه‌ ده‌یكاته‌ بازنه‌یه‌كی شانۆنامه‌.
ئه‌و ده‌نگانه‌ بۆ تێكست له‌ڕاستیدا ته‌واو بوونی ئه‌و سیستمه‌ی بیركردنه‌وه‌یه‌ له‌نووسین, ئیدی گێڕانه‌وه‌ی چیرۆكی شانۆنامه‌كان له‌توانای نووسین نین, له‌ناو فۆڕمێكدا چڕ ببنه‌وه‌, بۆیه‌ وه‌ك كۆمه‌ڵه‌ ده‌نگێك به‌رجه‌سته‌ ده‌بن, ئه‌گه‌ر له‌سێ‌ شانۆنامه‌كه‌ی پێشوو, ده‌نگ و كاره‌كته‌ر به‌رجه‌سته‌ی كه‌سێتی ژنێكی ده‌كرد, ئه‌وا لێره‌دا ده‌نگه‌كان له‌ خودی مرۆییه‌وه‌ ده‌په‌ڕنه‌وه‌ بۆ ئێمه‌ی قوربانی, ئێمه‌ بێگوناهی گوناهبار, ئه‌وه‌ سه‌ره‌تایه‌كی ترسناكی كۆتاییه‌, كۆتاییه‌ك له‌مانا ڕه‌مزیی و ئه‌خلاقیه‌كه‌ی دووركه‌وتنه‌وه‌یه‌ له‌ زمانی شانۆ و ده‌كرێت له‌ژانری ئه‌ده‌ب وهونه‌ری جیاواز سه‌ر ده‌ر بكاته‌وه‌, له‌مانا واقعیه‌كه‌شی بیركردنه‌وه‌و كۆتایی هێنانه‌ به‌ ژیانێك كه‌ به‌ خۆكوشتن كۆتایی دێت, وه‌ك له‌لای فه‌یله‌سووفی فه‌ڕه‌نسی ژیل دۆلۆز به‌دوای كتێبی “فه‌لسه‌فه‌ چیه‌” ده‌یبینینه‌وه‌, كه‌ سارا كه‌ین, له‌و تێكسته‌ سه‌ره‌تایه‌ك بۆ ئه‌و كۆتاییه‌ داده‌نێت, بۆیه‌ ده‌نگه‌كان نائاگایی نووسه‌ره‌ له‌ئاگایی زه‌مه‌ندا كه‌ كۆتاییه‌ك به‌نووسین و ژیان دێت “سی: ئه‌و (مێ‌) كۆتایی به‌مه‌ ده‌هێنێت بۆ ئه‌وه‌ی به‌رده‌وام بێت له‌ كۆمیدیای ڕۆژانه‌كه‌ی كه‌ تێپه‌ڕاندنی چه‌ند سه‌عاتێكی داهاتووه‌” تینووێتی/ سارا كه‌ین, وه‌رگێڕانی: باران, ده‌زگای چاپ وپه‌خشی سه‌رده‌م, 2016, لا 41

شانۆنامه‌ی “شێته‌كه‌ی سه‌عات 48: 4” ئه‌و دیده‌ زیاتر ده‌سه‌پێنێت, كاره‌كته‌ر وه‌ك مرۆڤ بوونی نیه‌, ئێمه‌ له‌به‌رده‌م ده‌ستنووسی خۆكوشتنداین, به‌ڵام ئه‌وه‌ نابه‌ستینه‌وه‌ به‌ یاده‌وه‌ری نووسه‌ر, هێنده‌ی وه‌ك بونیادی ناوه‌ندی زمانی تێكست خۆی سه‌یری ده‌كه‌ین.
تێكستێكی ته‌واو نه‌كراو وه‌ك ده‌ستنووسێك به‌دوای خۆی جێدێلێت كه‌ ئه‌وه‌یان ده‌كرێت تێكستی كۆتایی یاده‌وه‌ری نووسین بێت له‌ناو شانۆنامه‌كانیدا, كه‌ مانا ئه‌خلاقیه‌كه‌ی بۆ ئێمه‌ جێبێلێت و مانا واقعیه‌كه‌ش بۆ خۆی بباته‌ ناو كۆتایی ژیان.
شانۆنامه‌ی “شێته‌كه‌ی سه‌عات 48: 4 ” ئه‌مجاره‌یان نه‌ك به‌ته‌نیا كاره‌كته‌ر بوونی نیه‌, به‌ڵكو ئه‌و ڕۆڵه‌ش نیه‌ كه‌ به‌دوای كاره‌كته‌ر بگه‌ڕێت, ئه‌وه‌ی هه‌یه‌ مه‌نه‌لۆژێكی درێژه‌, گه‌ڕانه‌وه‌یه‌ بۆ ناو ناخی خۆی و ئه‌و وێنه‌ زهنیانه‌ی له‌یاده‌وه‌ری ئه‌ودا جێماون, بۆ ئه‌وه‌ی بۆی هه‌بێت له‌گه‌ڵ نه‌ستی خۆی بدوێت, هه‌وڵیداوه‌ مه‌نه‌لۆژه‌كه‌ له‌ناونیشانه‌وه‌ بباته‌ ناو دنیای نه‌ستی شێتێكه‌وه‌, بۆ ئه‌وه‌ی مافی ئه‌وه‌ بدات كه‌ ووتراو له‌ژێر چ لۆژیكێكه‌وه‌ ئه‌و ناسنوریه‌ته‌ ده‌به‌خشێت به‌ په‌یوه‌ندیی و تێگه‌یشتن و ڕوانینه‌كان.
ئه‌وه‌ واده‌یه‌كه‌ بۆ خۆكوشتنی شێتێك له‌كاتێكی ده‌ست نیشان كراو كه‌ كۆتایی به‌ ژیانێك بێنێت كه‌ ته‌واو تیایدا نائومێده‌ له‌بوونی خۆی و له‌بوونی دنیاو په‌یوه‌ندیه‌كانی “من به‌ره‌و مردنی خۆم هه‌ڵدێم/ من له‌وه‌رگرتنی چاره‌سه‌ر ده‌ترسم/ ناتوانم خۆشه‌ویستی بكه‌م/ من ناتوانم سێكس بكه‌م/ من ناتوانم به‌ته‌نیا بم/ من ناتوانم له‌گه‌ڵ كه‌سی تردا بم/ سێبه‌نده‌كانم پانن/ حه‌زم له‌ ئه‌ندامه‌ زایه‌ندیه‌كانم نییه‌/ من نامه‌وێت بژیم/ ئینجا سه‌عات چوار و چلوهه‌شت/ كاتێك بێئومێدی دێت بۆ سه‌ردان/ خۆم هه‌ڵده‌واسم” شێته‌كه‌ی سه‌عات 4:48/ سارا كه‌ین, وه‌رگێڕانی: باران, ده‌زگای چاپ وپه‌خشی سه‌رده‌م, 2016, لا 11


له‌بوونی ئه‌و چاره‌سه‌ره‌ پزیشكیانه‌ی كه‌ له‌ناو نووسین وه‌ك ئازارێك بۆ مه‌رگ و ئه‌فیوون كردن تاقی كردۆته‌وه‌, ئیدی ئه‌و تووشی دۆخێك هاتووه‌ نه‌ده‌توانێت ته‌نیا بێت و نه‌ له‌گه‌ڵ كه‌س بژیێت, ئه‌وه‌ ململانێی نێوان پێكه‌وه‌ بوون و ڕه‌تكردنه‌وه‌یه‌, بیركردنه‌وه‌یه‌ له‌خۆكوشتن و مانه‌وه‌ له‌گه‌ڵ خۆشه‌ویست, ئه‌وه‌ ئازاری مرۆڤه‌ له‌ژێر ده‌رمانه‌ بێهۆشكاره‌كان.
هه‌ستی گوناهباری كۆی خراپه‌كاریه‌كانی سه‌ر زه‌وی هه‌مووی ده‌گرێته‌ ئه‌ستۆی خۆی ئه‌وه‌ ڕه‌وایه‌تیدانه‌ به‌ مردن, مردن كه‌ پانتاییه‌كه‌ ته‌واوی نووسینی كه‌ین داگیر ده‌كات, له‌پاڵ شه‌ڕ وسێكس ئه‌و سێگۆشه‌یه‌ ته‌واو ده‌كه‌ن, كه‌ به‌ر له‌و له‌ئاستی تیۆریی فرۆید شیكارێكی ده‌روونی ئه‌و سێگۆشه‌یه‌ خستۆته‌ ڕوو, كه‌ سارا كه‌ین ئه‌و ئاسته‌ سێگۆشه‌یه‌ ده‌كاته‌ بازنه‌یه‌كی درامی بۆ ڕووداو, كه‌ له‌و تێكسته‌دا ئه‌و بازنه‌یه‌ به‌ره‌و داخرانی ته‌واو ده‌رگا به‌سه‌ر خۆی داده‌خات “من گازم به‌ جووله‌كاكاندا كرد, كوشتاری كورده‌كانم كرد, بۆمببارانی عه‌ره‌به‌كانم كرد, سواری منداڵی بچووك بووم له‌كاتێكدا داوای به‌زه‌ییان ده‌كرد, گۆڕه‌پانی جه‌نگی پڕ له‌ مردووه‌كان هی منن” شێته‌كه‌ی سه‌عات 4:48/ لا 36.
هه‌ڵبه‌ت به‌بێ‌ ویستی ئێمه‌ وسه‌پاندنی به‌ناو تێكستدا, به‌ڵام ده‌بێت ئه‌وه‌ش به‌هه‌ند وه‌ربگرین, كه‌ له‌شانۆنامه‌ی “ئه‌وینی فایدرا” كه‌ین ده‌یه‌وێت تۆڵه‌ له‌ باوك بكاته‌وه‌, ئه‌وه‌ی ئه‌و له‌ژیاندا به‌رامبه‌ری كردی, به‌ڵام ئه‌و له‌ناو نووسیندا و له‌ڕێگه‌ی ئه‌فسانه‌یه‌كی گریكیه‌وه‌ له‌ڕووی ڕه‌مزیه‌وه‌ باوك وه‌ك به‌دڕه‌وشترین كاره‌كته‌ر وێنا ده‌كات, تاوه‌كو ببێته‌ نمونه‌یه‌ك بۆ كاره‌كته‌رێكی به‌دڕه‌وشت, وه‌ك چۆن له‌ شانۆنامه‌ی “شێته‌كه‌ی سه‌عات 4:48” سه‌رباری ئه‌و هه‌موو تاوانه‌ی كاره‌كته‌ره‌كه‌ ده‌یخاته‌ ئه‌ستۆی خۆی, خۆی وێنا ده‌كات به‌ خراپترین مرۆڤه‌كان, به‌ڵام هه‌رگیز نایه‌وێت وه‌ك باوكی خۆی بێت “له‌ڕاستیدا من چیم ڕێك وه‌ك باوكم/ ئۆه نا ئه‌وه‌ نا ئوه نانانا” لاپه‌ڕه‌ 53.
ئه‌و جۆره‌ خوێندنه‌وه‌یه‌ی بونیادی ده‌ره‌وه‌ی نووسین به‌ناو نووسین ده‌به‌ستێته‌وه‌, به‌تایبه‌ت له‌خوێندنه‌وه‌ی ده‌روونشیكاریانه‌ ده‌توانێت ئاسۆیه‌كی تر له‌په‌یوه‌ندیی ژیانی نووسه‌ر به‌ تێكست بكاته‌وه‌, كه‌ ئه‌وه‌ ئامانجی ئه‌و نووسینه‌ی ئێمه‌ نه‌بووه‌, هێنده‌ی خۆمان له‌ته‌واوی ئه‌و تێگه‌یشتنه‌ به‌دوور گرتووه‌ و ته‌نیا ویستوومانه‌ له‌ناو بونیادی زمان و ناوه‌ندگه‌رێتی تێكسته‌وه‌ جیهانبینی نووسه‌ر بخوێنینه‌وه‌, به‌تایبه‌ت له‌باره‌ی سێكس و شه‌ڕ ومه‌رگ.
له‌ئێستادا به‌ر له‌وه‌ی ده‌رگا له‌دنیای ئه‌و نووسه‌ره‌ له‌ناو ئه‌و نووسینه‌ دابخه‌ین, پێویسته‌ له‌سه‌ر ئه‌وه‌ بووه‌ستین كه‌ ئاخۆ شانۆنامه‌كانی سارا كه‌ین پێویستیه‌كن بۆ شانۆی ئێمه‌؟ ئایا ده‌كرێت بكه‌ونه‌ سه‌ر ته‌خته‌ی شانۆكانمان؟ چاره‌سه‌ری درامی ئه‌و شانۆنامانه‌ له‌كرده‌ی ده‌رهێنان چۆن نمایش ده‌كرێت؟ به‌تایبه‌ت له‌كۆمه‌ڵگایه‌كی وه‌كو كۆمه‌ڵگای كوردیی كه‌ سێكس یه‌كێكه‌ له‌بابه‌ته‌ تاپۆكان؟ ئه‌و پرسیارانه‌ ده‌كه‌ینه‌ وێستگه‌یه‌ك تاوه‌كو هه‌ڵوه‌سته‌یه‌ك بكه‌ین و له‌و ڕێگه‌یه‌وه‌ ده‌رگا له‌سه‌ر ئه‌و بازنه‌ شانۆییه‌ی سێكس و شه‌ڕ و مه‌رگ دابخه‌ین.
له‌رٍووی بابه‌ته‌وه‌ ئێمه‌ شتێكی نامۆ و هه‌ژێن نابینین, چونكه‌ ئه‌وانه‌ ئه‌و بابه‌تانه‌ن كه‌ ڕۆژانه‌ چیرۆكی جیاوازی له‌ناو كۆمه‌ڵگای كوردیی پێده‌بیستین, به‌ڵام كه‌س ئاره‌زووی ئه‌وه‌ ناكات ئه‌وه‌ له‌سه‌ر شانۆ بینێت, چونكه‌ نهێنی وحه‌قیقه‌تی نێو ماڵه‌كانه‌, جگه‌ له‌وه‌ی زمانی ساده‌ی كه‌ین له‌نووسینی ده‌یالۆگ دوو هۆكارن بۆ دووركه‌وتنه‌وه‌ یه‌كێكیان كۆمه‌ڵایه‌تیه‌و ئه‌ویتر كولتوریه‌.
هۆكاره‌ كۆمه‌ڵایه‌تیه‌كه‌ ئه‌وه‌یه‌ كه‌ ئه‌وه‌ گرفتی نێو ماڵه‌كان و چیرۆكه‌ به‌دڕه‌وشته‌كانی سێكسی لاده‌ر پێشتر بیستمان و ئاره‌زووی بیستنیان ناكه‌ینه‌وه‌, هۆكاره‌ كولتوریه‌كه‌ش بۆ ئه‌وه‌ ده‌گه‌ڕێته‌وه‌, ئێمه‌ له‌شانۆدا بیر له‌زمانی ئاڵۆز و دووركه‌وتنه‌وه‌ له‌زمانی ساده‌ به‌كاری خۆمان ده‌زانین, هۆیه‌كه‌شی ساده‌بوونی بێفكری ناو تێكسته‌ كوردیه‌كانمان وایان لێكردین بیر له‌زمانی ساده‌ نه‌كه‌ینه‌وه‌, چونكه‌ ده‌ربڕینێك بوو هیچی به‌رهه‌م نه‌ده‌هێنا, هه‌ڵبه‌ت ئه‌زموونی ساده‌ ده‌ربڕینی سارا كه‌ین ته‌واو جیاواز له‌و دۆخه‌, به‌ڵام گرفتی ساده‌یی به‌ته‌نیا له‌ ووتراوی زمان نیه‌, به‌ڵكو له‌دیمه‌نی ڕه‌وانی سه‌ر شانۆیه‌, كولتوریی كوردیی توانای قبووڵ كردنی ئه‌و دیمه‌نانه‌ی نیه‌, مه‌گه‌ر وێنه‌كان له‌وێنه‌ی واقعیه‌وه‌ بگوازینه‌وه‌ بۆ وێنه‌ی سیمبولی و دیمه‌نه‌ سێكسیه‌كان له‌واقیع بوون دابماڵدرێن, وه‌ك وێنه‌ی سیمبولی كاریان تیا بكه‌ینه‌وه‌, ئه‌وه‌ش بۆخۆی دووركه‌وتنه‌وه‌یه‌ له‌شانۆنامه‌كانی نووسه‌ر, ئیدی هه‌ست ده‌كه‌ین له‌ناو جیهانبینیه‌كیترداین, نه‌ك له‌ناو دنیای شانۆیی نووسه‌ر.
ئه‌و پێنج شانۆنامه‌یه‌ ڕه‌نگه‌ سه‌خت بن بكه‌ونه‌ سه‌ر ته‌خته‌ی شانۆكانمان, مه‌گه‌ر له‌گه‌ڵ چه‌ند ئه‌كته‌رێكی بوێر یاخود درووست كردنی گروپێكی شانۆیی تایبه‌تمه‌ند كه‌ بێباك بێت له‌كاردانه‌وه‌ی كۆمه‌ڵایه‌تی و بوێرانه‌ كار له‌ تێكسته‌كان بكات, ئه‌وه‌ش پێویستی به‌ر له‌پڕۆڤه‌ به‌ مه‌عریفه‌ی فه‌لسه‌فی و ده‌روونشیكاری هه‌یه‌ به‌تایبه‌ت له‌باره‌ی مێژووی سێكسوالێتی میشێل فۆكۆ و ده‌روونشیكاری سیگمۆند فرۆید به‌تایبه‌ت له‌ كتێبی سێكس و شه‌ڕ و مه‌رگ كه‌ ده‌روازه‌ی تێگه‌یشتنته‌ له‌دنیابینی سارا كه‌ین.








ئه‌م په‌ڕه‌یه‌ 306 جار خوێندراوه‌ته‌وه‌
وته‌
پێویستمان بە دیالۆگی زیاترە، نەوەک مۆنۆلۆگی زیاتر.

/ستێفان گوننارسسۆن

ڤیدیۆ

خەڵکی کوێی کوردستانیت؟




ڕیکلام
Banner